• Home
• Canon Text
• Romanized
• śāstrapiṭaka
• vyākaraṇa
• Paribhāṣāvṛtteh

Paribhāṣāvṛtteh

Technical Details

paribhāṣāvṛtteḥ |

prathamādhyāyasya prathamaḥ pādaḥ |

śrīgaṇeśāya namaḥ |

sphuradabhinavarāgā bhāskarābhā pragalbhā

prasabhaśamitadoṣā sphītasallokacakrā |

vihitahitavicārā jāḍyajātopaśāntyai

prabhavatu paribhāṣāvṛttirāsevitaiṣā || 1 ||

vyākhyānato viśeṣapratipattirna hi sandehādalakṣaṇam || 1 ||

vyākhyānādācāryapāramparyopadeśātsandehe'pi viśeṣāvagamo bhavati na tu lakṣaṇābhāva iti | tena ṣaṣṭho sthāneyogenetyasya pratyākhyāne ṣaṣṭhonirdeśeṣvanekasaṁbandhasaṁbhave'pi sthāneyogaiva bhavati | taduktaṁ “vyākhyānato viśeṣapratipattirna hi sandehādalakṣaṇamiti sthāneyogeti vyākhyāsyāma”iti ||

tathā catvāryaṇagrahaṇāni pūrveṇa ṇakāreṇa | aṇaditsarvarṇasya cāpratyaya ityekaṁ pareṇa | iṇgrahaṇāni tu pareṇaiveti || atra yuktayo'pi yathāsaṁbhavamabhidhīyante | tatra ke'ṇaḥ dralopeṁ pūrvasya dīrgho'ṇa ityatrāṇagrahaṇasāmarthādavasīyate pūveṇeti | yadi pareṇa syāt | acāmeva hrasvadīrghābhyāṁ bhāvyam | etaccācaśca iti paribhāṣayaiva siddhaṁ tatkimaṇagrahaṇeneti | saiṣā yuktiḥ śakyate vyabhicārayitum | acaścetyevaṁ siddhayo hraṁsvadīrghayoryadaṇgrahaṇaṁ karoti tasyaitatprayojanamanaco'pyaṇo dīrghahrasvau yathā syātām agīṣkaḥ adhūṣkaḥ śvaliṅkaḥ madhuliṅkaḥ vaḍhāṁ varḍhumiti | evaṁ ca laṇityatra yannyāsakṛtoktaṁ ke pare halāmaṇāmasaṁbhavādityādi, tathā dīrghaśrutyā'caśceti saṁnidhāpite'ca eva dīrghatvena bhavitavyamityādi taccintyam | atra ke ciccintayanti | agīṣka ityādau visarjanīyādiṣu kṛteṣu hakāro'ṇ rephaśca nāsti | na cāstyasiddhatvam | na mune iti yogavibhāgena niṣiddhatvāt | anabhidhānaṁ tu na vaktavyam | roḥ supi ityatrāgīṣkādīnāṁ nyāse vyākhyātatvāt || dīrghavidhau ca varḍhā varḍhumityādau pareṇa ṇakāreṇa pratyāhāragrahaṇādanaco'pi rephasya yaddīrghatvamuktam | tanna | yadyetatprayojanaṁ syāt tadā hayavarataṣṭakāreṇa pratyāhāraṁ kuryāt | dralope pūrvasya dīrgho'ṭa iti | atha vā'stu varḍhā varḍhumityādau dīrgha eva ṝkāraḥ tathāpi kṛte tasminnādguṇa ityakāraṛkārayorguṇenākāre raparatve ca kṛte tadeva rūpaṁ varḍhā varḍhumiti | ato'caśca iti siddhi yadaṇgrahaṇaṁ tatpūrveṇa ṇakāreṇa pratyāhārārtham | na ca pareṇa ṇakāreṇa pratyāhāragrahaṇe rephasya dīrghavaiyarthyātpunarādguṇabādhaḥ kalpanīyaḥ | evaṁ hi sāmarthyadvayaṁ syāt || savarṇavidhau pareṇa ṇakāreṇa pratyāhāragrahaṇe urṛt iti taparakaraṇaṁ jñāpakam | yadi tatrāpi pūrveṇa syāt evaṁ ca sūtropāttasya mātrikasya sthāne sūtropātte ṛkāre vidhīyamāne sāvarṇyābhāvād dvimātrikasya prāptireva nāstīti taparakaraṇamanarthakaṁ syāt | yacca laṇityatra nyāsakṛtoktaṁ dīrghasyāpi sthānino yathāśrutena hrasvenaiva bhavitavyamiti taparakaraṇamanarthakaṁ syād vyāvarttyābhāvāditi | tatra dvimātrikasya sthānitvaṁ yaduktam | tadasaṅgatam | ādeśavatsthānino'pi dvimātrasyābhāvāt | atha jātau dvimātrasya sthānitvamiti cenna | evamādeśe'pi dvimātratvaprasaṅgaḥ | atha sthāninaṁ prati jātirādeśaṁ prati vyaktiretacca na hṛdayagrāhi | evaṁ tarhi ṛkāraṝkārayoḥ samāhāradvandvaikatvena napuṁsakahrasvatvena ca urṛditi nirddeśe dīrghasyāpi sthānitvam | numabhāvastvāgamaśāsanasyānityatvāt | idamatha yuktam | vyaktireke'ṇapratyāhāre ṝkārasyānantarbhāvāt sāvarṇyen ṛkāreṇa ṝkārasyāgrahaṇāddṛkārasyāctvaṁ nāsti | ato'co hrasvatvaṁ vidhīyamānamṝkārasya kathaṁ syāt | ucyate | hrasvo napuṁsake prātipadikasya ityanenāco hrasvatvaṁ vidhīyate | acpratyāhāre ca ṛkāro'sti tatra ṛkāreṇa ṛtvajāterāśrayaṇād dvimātrikasyāpi ṝkārasya hrasvatvena bhāvyameveti yuktaṁ dīrghasyāpi sthānina ityādi || 

iyaṁ ca paribhāṣā laṇityatra bhāṣyakāreṇa jñāpitā | taduktam | “kiṁ punarayaṁ varṇotsattāvibra ṇakārassandehaheturanubaddho'pi punaranubadhyate yasmādanenāṇgrahaṇeyviṇgrahaṇeṣu ca saṁdehaḥ kiṁ pūrveṇa pareṇa veti evaṁ tarhi jñāpayatyācāryo bhavatyeṣā paribhāṣā vyākhyānata ityādi ||

(1) atha kathaṁ viśeṣapratipattirityatra ṣaṣṭhīsamāsaḥ | yāvatā karmaṇi ca ityanena pratiṣedhena bhāvyam | na ca kṛdyogalakṣaṇā ṣaṣṭhī samasyata ityanena samāsaḥ śakyate karttum | tadviṣaye eva karmaṇi cetyasyārambhāt | ucyate | karmaṇi cetyanenobhayaprāptau karmaṇi ityanena niyamena yā ṣaṣṭhī tasyā eva samāsapratiṣedho vijñāyate | atra cārthe karttari ca iti sūtraṁ pramāṇam | anyathā apāṁ sraṣṭā odanasya bhojaka ityādau karmaṇi cetyanenaiva pratiṣedhasya siddhatvāt karttari cetyanarthakaṁ syāt | na ca praiṣyasya hārayitā praiṣyasya kārayitā ityatra hṛkroranyatarasyām iti karttari ṣaṣṭhīsamāsapratiṣedhārthamidamiti | tṛjakābhyāṁ karttari ityanenaiva tatsiddhiḥ | yattu tṛjakābhyāṁ karttarītyatra vṛttāvuktaṁ tṛjgrahaṇamuttarārthamiti tatkarttari ceti sūtre sthite iti | aṇyantāpekṣayoktamuttarārthamityeke | ubhayaprāptāviti niyamena ca ṣaṣṭhī ṣaṣṭhī hetuprayoge ityataḥ prayogagrahaṇānuvṛtteryatra sāmarthyaprāptaṁ kartṛkarmaṇorubhayorupādānaṁ tatraiva yathā syāt | yathā āścaryo gavāṁ doho'gopālakeneti | tathā hyatrāścaryaṁ pratipādyaṁ tacca durdohānāṁ gavāṁ karmaṇāmasuśikṣitasyāgopālakasya ca karttuḥ sāmarthyaprāpte upādāne ṣaṣṭhī bhavati nānyathā | viśeṣapratipattirityatra tu śiṣyādeḥ karturakiṁcitkaratvānna sāmarthyaprāptaṁ kartturupādānam | evaṁ ca sati antarddhau yenādarśanamicchati ityatra yeneti tṛtīyā na yuktā kartṛkarmaṇoḥ kṛti iti karttari ṣaṣṭhīvidhānāt | ucyate | nirddeśādeva tṛtīyetyadoṣaḥ | anyastvācaṣṭe | gamyamāne'pi karmaṇi ubhayaprāptāviti niyamo bhavatyeva | tathā cāntarddhau yenādarśanamicchatītyatra nyāsakṛtā ubhayaprāptau karmaṇi ityatra rakṣitena ca gamyamāne'pi karmaṇi niyamātṣaṣṭhyabhāvena antarddhau yeneti nirddeśasiddhiruktā | kiṁ tvevamaiuṇityatra tasya grahaṇaṁ bhavatyekeneti tatra tasyeti karttari ṣaṣṭhīti nyāse yaduktaṁ tanna śobhanam | tathā hyatrāpi gamyamāne grāhye karmaṇi ubhayaprāptāviti niyamātṣaṣṭyā na bhavitavyam | etacca śabdānuśāsane nyāsakṛtā vyākhyātam | yattu tatra svamatimahimaprāgalbhyādanunyāsakāro vyājahāra | yatra sāmarthyaprāptamubhayorupādānaṁ sa ubhayaprāptau karmaṇītyasya viṣayaḥ | anyathā kartṛkarmaṇoḥ kṛtītyasya vidherubhayaprāptāvityādeśca viṣayavibhāgo na syāt | na cākartṛkaṁ karmāstīti nyāyāditi | tadayuktam | purāṁ bhettā devadatta ityādau abhihite kartari niyamāprasaṅgāt | atrocyate | ṣaṣthī hetuprayoge ityato'nuvarttamānamapi prayogagrahaṇamanaṅgīkṛtya yathā yuṣmābhirgamyamāne karmaṇi ubhayaprāptāviti niyama ucyate tathā'smābhirapyanabhihitādhikāramanaṅgīkṛtya vibhāgābhāva uktaḥ | etaccāyuktam | akākārayīḥ pratiṣedhoḥ vaktavya ityanyena yatra niyamo bādhyate tatra vidheḥ kṛtārthatvāt | cikīrṣāraverālokānāmiti | tathā kāryaḥ kaṭo devadattasyetyatrābhihite karmaṇi ṣaṣṭhīprasaṅgācca | ucyate | kartṛkarmaṇoḥ kṛtītyasya vidherubhayaprāptāvityādeśca vidheriti naite samānādhikaraṇe ṣaṣṭyau kiṁ tarhi vaiyadhikaraṇye | tadayamarthaḥ kartṛkarṁaṇoḥ kṛtītyasya saṁbandhī yo vidhiḥ karttari ca iti, tathobhayaprāptau karmaṇītyasya yo vidhiḥ karmaṇi ca iti etayorviṣayavibhāgo na syādityayamabhiprāyaḥ | yadi gamyamāne'pi karttari ubhayaprāptāviti karmaṇi niyamaḥ syāt tadā idhmavraścana ityādāvapi karaṇe lyuṭi karmaṇi ceti niṣedhaḥ syāt kartṛlyuṭyapi idhmapravraścano devadatta ityatrāpi ātmanā devadattenetyasya karturgamyamānatvādubhayaprāptiravyāhataiva | evaṁ ca karmaṇi yā kā citṣaṣṭhī tasyā eva sarvasyāḥ karmaṇi cetyanena samāsapratiṣedhe siddhe kartari cetyanārambhaṇīyaṁ syāt | ārabdhaṁ cāto yuktamuktaṁ viṣayavibhāgo na syāditi | etacca na | ātmanetyasya kartturgasyamānatve pramāṇābhāvāt | evaṁ tarhi purāmbhettā devadatta ityādau yathā kartturabhihitatvānniyamo na bhavati tathā śabdānuśāsanamityatrāpi karturaprayogāt | tatra yathā karttṛṣaṣṭhīprāptyā vināpi gamyamāne karttari niyama ucyate tathābihite'pi karttari niyamamuttkā (niyamamuktā?) viṣayavibhāga uktaḥ | evaṁ ca vidhiniyamavākyayoreva viṣayavibhāgābhāvaḥ | etaccākākārayoḥ prayoge vidheḥ kṛtārthatvānāśrayaṇenocyate || 1 || 

na hi kāryī nimittatvenāśīyate || 2 ||

yatkāryabhāk tatkaryaṁ prati nimittaṁ na bhavatītyarthaḥ | tenādhyetā adhyāpakaḥ śayitā śāyaka ityatra iṅśīṅorṅitvāt kṅiti ca iti guṇavṛddhipratiṣedho na bhavati | tathā'ririṣatītyatra dvirvacane'ci iti sthānivadbhāvo na bhavati | yadi syāt iso dvirvacane kṛte'rīṣatīti syāt ||

jñāpakaṁ cātra dīdhīvevīṭām ityatra ṅitorapi dīdhīṅvevīṅorguṇavṛddhipratiṣedhārthamupādānam | na ca kṅiti cetyanena iglakṣaṇāyā eva vṛddheḥ pratiṣedhaḥ kriyate, ato'jlakṣaṇāyā api vṛddheḥ pratiṣedhārthaṁ dīdhīvevyorubhayorupādānaṁ syāditi vācyam | indhibhavatibhyāṁ ca ityatra bhavatigrahaṇenājlakṣaṇāyā api vṛddheḥ pratiṣedho bhavatītyasyārthasya jñāpitatvāt | nanu ca bhāṣye vuko nityatvādindheścchāndasatvādindhibhavativyāṁ ceti sūtraṁ pratyākhyātaṁ tathā dīdhīvevīṭāmityapi | yadāha dīdhīvevyorgrahaṇamanarthakaṁ anayośchāndasatvāt | ādīdhet ādīdhayurityatra guṇadarśanācca | iṭaścāpi grahaṇamanarthakaṁ neḍvaśi kṛti ityata iḍgrahaṇānuvṛttau ārddhadhātukasyeḍvalādeḥ ityatra yadiḍgahaṇaṁ tadiṭo vikārābhāvārtham | tato laghūpadhaguṇābhāvāt siddhaṁ kaṇitā śvo raṇitā śva iti | na caivaṁ pipaṭhīrapāṭhīdityādāvapi dīrghatvaṁ na syāditi vaktavyam | yataḥ samānajātīyatayāṅgakāryameva vyāvarttyate | grahītetyatra tu graho'liṭi ityādisūtrārambhād dīrghatvam | tarhi pipaṭhīṁṣi brāhmaṇakulānītyatra sāntamahataḥ saṁyogasya iti dīrghatvaṁ na syāditi cenna | numevātra nāsti numi karttavye'llopasya sthānivattvenājhalantatvāt | na ca kvau lupte na sthānivadityasti | kvau vidhaṁ prati na sthānivaditīdaṁ vārttikamiti kaiyaṭena vyākhyātam | evaṁ ca kvau nātra num api tu sarvanāmasthāne | vāmanastu kvau lupta ityeva manyate | tathā ca maparyantasya ityatra tena parigrahaṇaṁ varjanīyārthamityuktam | tena yatraiva varjanīyamasti tatraivādeśa iti | tena yuṣmadasmadorṇici ṭilopaḥ | yuṣmayateḥ kvip tataḥ svādayaḥ atra varjanīyābhāvādādeśā na bhavanti | na cāsti ṇilopasya sthānivattvam | kvau lupte na sthānivaditi vacanāt | tadevaṁ sthitametat | bhāṣyamate na hi kāryītyasyā liṅgaṁ nāsti | sthaṇḍilācchayitari ityatra śayitarīti nirddeśo'syā liṅgaṁ kuṭādiṣu kuṅ śabde ityasya pāṭho vā || 

anye tu vyācakṣate | iglakṣaṇavṛddhipratiṣedhastāvat kṅitpratyayanimittaka eva saṁbhavati na tu kṅiddhātunimittakaḥ | ato mṛṣṭaḥ mṛṣṭavān nyanuvīt nyaghuvīt ityādau kṅinnimittakaḥ pratyaya eva parato vṛddhipratiṣedhastatsāhacaryād guṇapratiṣedho'pi bhūyate bobhūyate ityādau kaṅinnimittakaḥ pratyaya eva kartavyaḥ | ata evādhyetā śayitetyatra kṅiddhātunimittakena pratiṣedhena na bhavitavyam | aririṣātītyatrāpi dvirvacaneci ityajādeśaṁ prati nimittabhāvo'kāryitvenaiva niyataḥ tadevamajādeśasaṁbandhe'cītyasyākāryitvaṁ tatsāhacaryād dvirvacanavidhāne'pi yadyakāryitvamevācītyasya tadā sthānivattvaṁ yathā cakruturiti | aririṣatītyatra tu dvitīyasyakāco dvirvacanādikārasya dvirvacanabhāktamiti dvirvacanavidhāne'cītyasya kāryitvaṁ na punarakāryitvamiti | tasmātparibhāṣā prayojanābhāvānna svīkarttavyā | yuktaṁ caitat | anyathā asyāṁ satyāṁ prorṇunaviṣatītyatra guṇāvādeśayoḥ kṛtayordvicane'cīti sthānivattvaṁ na syāt | sannantasya kāryitvāt | tathā dvirvacane'cītyatrācīti kimityuktā heghrīyate dedhmīyate iti yatpratyudāhṛtaṁ tannopapadyate dvyaṅgavaikalyāt yathaiva yaṅ ajādirna bhavati tathā dvirvacananimittamapīti | tatra tahīrdaṁ vaktavyam | kāryamanubhavanneva kāryo nimittatvena nāśīyate, jeghrīyata ityatra kāryamananubhavan nimittatvenāśrīyate | anyanstu nāśrita eva | tathā hi | aririṣatītyatra sthānivattvena iso dvirvacanaprasaṅgādajādereva sanaḥ kāryitvaṁ nimittatvaṁ ca | prorṇunaviṣatītyatra tu ajādeḥ sano nimittatvaṁ kāryitvaṁ ca dhātornuśabdasyaiva tasyaiva dvirvacanavidhānāt | ato'tra sanaḥ sākṣāt kāryitvaṁ nāstīti yuktameva nimittatvenāśrayaṇamiti | evamapi śādhītyatra śāhau ityasya śādeśasya dhibhāvaṁ prati samānāśraye hāvasiddhatvanna syāditi | dhibhāvasya sthānino hiśabdasyānimittatvena samānanimittatvābhāvāt | tatra vaktavyaṁ prāyikametat | lakṣyavaśāt kva cidāśrīyate || 2 || 

itaretarāśrayāṇyapi kāryāṇi śāstre prakalpante || 3 ||

itaretarāśrayāṇi kāryāṇi viroddhānna pravarttanta iti nyāyaḥ yaduktamitaretarāśrayatvādaprasiddhiriti | tadapavādo'yamārabhyate | apiśabdaḥ kva cidarthe | tadayamarthaḥ | kva ciditaretarāśrayāṇi pravarttanta iti | yathā vanasiṁhayoḥ parasparāśrayāpi rakṣā pravarttate | tathā śāstre gārgīya ityādau vṛddhisaṁjñayā bhāvitasyāpi vṛddhisaṁjñā prakliptiḥ | anyathā śālārairauprabhṛtiṣu sāvakāśā vṛddhisaṁjñā itaretarāśrayatvānna syāt ||

jñāpakaṁ cātra igyaṇaḥ saṁprasāraṇam ityatra saṁprasāraṇena yaṇaḥ sthāne iko bhāvyante | yaṇsthānikānāṁ cekāṁ saṁprasāraṇasaṁjñeti itaretarāśrayatvam | kathametadanyathā prakalpate | yadītaretarāśrayatvaṁ kva cinna syāditi | bhāgavṛttikārastvāha | nityaśabdānāmanvākhyānamātramidamiti tato netaretarāśrayadoṣaḥ || yaduktaṁ sarvāṇītaretarāśrayāṇi bhāṣye parihṛtāni siddhaṁ tu nityaśabdatvāditīti | athaitatsyāt yaṇaḥ sthāne igvidhīyate sthānyādeśabhāvaśca pauruṣeyaḥ tatkṛto nityatvamiti | naiṣa doṣāḥ | loke hi iṣṭaṁ yaṣṭetyādayo nityāḥ tatra yajerarthe ijirviśiṣṭaviṣaye sādhurityetāvati puruṣāśrayatvaṁ svabhāvata eva yajeḥ sthāne ijisiddhiḥ || 3 ||

āgamāstaṅguṇībhūtāstadgrahaṇena gṛhyante || 4 || 

ādyantau ṭākitau ityatrādyantaśabdayoravayavavacanatvāt ṭitkitorāgamayorādyantāvayavatvamatidiṣṭaṁ midaco'ntyātpara ityatrāpi antagrahaṇanuvṛttyā mito'pyantāvayavatvam | avayavāścāvayavigrahaṇena gṛhyante ityuktamataḥ siddheyaṁ paribhāṣā āgamāstadguṇībhūtā iti ||

sukhapratipattyarthaṁ ca jñāpakamapi kecidāhaḥ | ṇeraniṭi ityatrāniṭīti pratiṣedhaḥ | yadyāgamigrahaṇenāgamo na gṛhyeta tadā kārayitavyamityādau itā vyavahitatvādeva ṇilopo na prāpnotīti kimaniṭītyaneneti jñāpakam | tena sarveṣāmityatra suṭaḥ subgrahaṇena grahaṇājjhalādau supi etvaṁ siddhyati ||

nanu asyāṁ satyāṁ cicchidatuḥ cicchiduḥ ityādau halādiḥ śeṣeṇa tuko nivṛttiḥ prāpnoti | ucyate | halādiḥ śeṣa ityatrāṭaturāṭurittyādisiddhyarthaṁ jātipakṣa āśritaḥ | tatracaikamevedaṁ lakṣaṇaṁ sakṛdeva papāṭhetyādau anāderhalo nivṛttiṁ karoti | tadevaṁ cicchidaturityādau halādiḥ śeṣānantaraṁ yastuk tasya nivṛttirna prāpnoti | lakṣaṇābhāvāt | avaśyaṁ caitat | anyathā'jāderdvitīyasyetyatra bhāṣyakāreṇa ca maitreyeṇa ca yadudāhṛtam | oṇeruvoṇiṣatīti syāditi sāvakāśameva dvitīyadvirvacanamiti | tadasaṅgataṁ syāt | halādiḥ śeṣeṇa vakāralopaprasaṅgāt | yadyevaṁ vavṛte ityādau urattve raparatve ca kṛte rephasya lopo na syāt | ucyate | halādiḥ śeṣa ityatra urat ityanuvarttiṣyate tena uraditi kṛte rephasya nivṛttirbhaviṣyati | evaṁ tarhi uñcheraiñcicchadityatra tuki kṛte halādiḥ śeṣeṇa tasya nivṛttiḥ syādeva | ucyate | checa ityatra hrasvagrahaṇe'nuvarttamāne punaryaccakāreṇa tasyānuvarttanaṁ tatsāmarthyāt hrasva āgamī svīkriyate na tu hrasvāntaḥ samudāyaḥ | evaṁ cābhyāsāvayavasyaiva bhaktastuk kriyate tatsāmarthyādihāvayavāvayavo'pi avayavigrahaṇena na gṛhyate anyatra tu gṛhyata eva | ataeva śerata ityatrāvayavāvayavaḥ samudāyāvayavo bhavatītyuktā śīṅo ruṭ ityatra śīṅaḥ sārvadhātuke guṇa uktaḥ | evaṁ tu śobhanacchāya ityatra tukā uttarapadasya vyavadhānātpuṁvadbhāvo na syāditi dūṣaṇam | ucyate | hrasvaṁ pratīdaṁ jñāpakaṁ padāntādvā ityatra tu nāsti | dadhi chādayatītyatra svaravidhau vyañjanamavidyamānavaditi tiṅñatiṅa iti nighātaḥ śakyate karttum | asyāṁ satyāṁ prātipadikāntanum vibhaktiṣu ca ityatra numgrahaṇasya prayojanaṁ na dṛśyate | bhartṛhariṇā tūktam yaḥ prātipadikānto nakāro na bhavati tadarthaṁ numgrahaṇaṁ prāhiṇvaditi atra hi hiverlaṅi numo ṇatvamiti | tatra ca pūvapadādhikāraḥ samāse ca pūvottarapadavyavahāraḥ tatkathamiha ṇatvamiti na vyaktīkṛtamiti bhāgavṛttikṛtoktam | yadyevaṁ prahiṇvannityetadarthaṁ tarhi numgrahaṇaṁ syāt | ucyate | alpāctaramityanena prātipadikānta ityādau numaḥ pūrvanipāte karttavye yatprātipadikavibhaktimadhyasthaṁ numgrahaṇaṁ karoti tadevaṁ bodhayati yo'nayoreva madhyastho numnakārastasya ṇatvaṁ bhavatīti | aṭkughāṅnumvyavāsepi ityatra bhāgavṛttikṛtā pratipāditaṁ numaḥ pūvanipātalakṣaṇavyabhicāracihnāt prenvamityatra ṇatvābhāvaḥ kṣubhnādityādvā tena saha samānam | nanu mitvānnumaḥ pūrvāntatve niṣkauśāmvinī kule ityatra paratvānnumi kṛte napuṁsakahrasvatvaṁ na prāpnoti ajantatvābhāvāt | yathā suvāk brāhmaṇakulamiti | naiṣa doṣaḥ vibhaktyāśrayaṇād bahiraṅgo num hrasvatamantaraṅgaṁ vibhaktyanāśrayatvāt tatprathamaṁ bhaviṣyati | taduktam | na vā bahiraṅgalaṇatvāditi || 4 ||

nirddiśyamānasyādeśa bhavanti || 5 ||

ṣaṣṭhyā nirddiṣṭasya samudāyasya tadekadeśasya vā''deśā bhavanti | tadyathā | pādaḥ pat iti ṣaṣṭhyā nirddhiṣṭasyaiva pādaḥ sthāne padbhavati dvipadaḥ paśyeti nāṅgādhikāraparibhāṣayā tadantasya | tathā bhavetāmityatra tasaḥ sthāne tāmādeśo bhavati na sayāsuṭaḥ | tadekadeśasya yathā | udaḥ sthāstambhoḥ pūrvasya iti tiṣṭhaterādideśasya pūrvasavarṇo vidhīyamāna udasthādityatrāṭo na bhavati | tathā ṣyaṅaḥ samprasāraṇam iti ṣyaṅekadeśasya samprasāraṇe vārāhīputra ityatrānayā rephavakārayoḥ samprasāraṇābhāvo vyākhyātaḥ ||

iyaṁ paribhāṣā ṣaṣṭhī sthāne yogā ityasyārthe paṭhyate | tathā hi tatra bhāṣyam | yadyapyekaśataṁ ṣaṣdyarthāḥ yāvantaste tāvantaḥ ṣaṣṭhyāmuccāritāyāṁ sarve prāpnuvanti arthā ye punaḥ samīpāntaravikārādyāḥ, śabdasya tu ko'nyo bhavitumarhati anyadataḥ sthānāt | nanu śabdasyāpyanantarādayaḥ sambandhāḥ sambhavanti | astebhūrbhavatīti sandehaḥ kiṁ sthāne samīpe vā tatra samīpe na bhaviṣyati dvayorekārthayorekatra prayogānupapatteḥ | kiṁ ca sandehamātramatat | sarvasandeṣvidamupatiṣṭhate bhavati hi vyākhyānato viśeṣapratipattirna hi sandehādalakṣaṇamiti sthāne iti vyākhyāsyāmaḥ | na tarhīdānīmayaṁ yogo vaktavyaḥ | vaktavyaḥ | kiṁ prayojanaṁ ṣaṣṭhyantaṁ sthāne yathā prasajyeta | yataḥ ṣaṣṭhī uccāritā tadeva kāryopayogi yathā syāt | tadetenaitatpratipāditaṁ nirddiśyamānasyādeśā bhavantīti | asyāṁ satyāṁ śīṅo ruṭ ityatra yannyāsakṛtoktaṁ yadi ruḍāgamo jhakārasyaiva syāt tadā'dādeśo jhakārasya na syāt tasyaiva ruṭaḥ syāt ādeḥ parasyeti vacanāt | tathā maparyantasya ityatra yadudāhṛtaṁ yuvakāmiti sākackasya syāditi | etadanapekṣya tatsamādheyam || 5 ||

nānubandhakṛtamanekāltvam || 6 ||

anubandhakṛtamanekāltvaṁ nāśrīyate | tenārvaṇastrasāvanaña iti arvantau arvanta ityatra trādeśo'ntyasyaiva bhavati na sarvasya | ke cittu dyubhyāṁ dyubhirityudāharanti | tanna śobhanam | diva ut ityanena ukārasyaiva vidhānāt | tathā hi taparastatkālasya iti udityeṣā saṁjñā ukāramātrasyaiva vidhīyate | evaṁ ca diva udityanena ukāra eva kevalo vidhīyate na tūcchabdaḥ | avaśyaṁ caitat | anyathā'tobhisa aisa ityatra kā gatiḥ syāt | na hyatrāta ādeśo vidhīyate kiṁ tarhi atsaṁjñayā akāraḥ saṁjñī nirddiśyate ||

yattu sthāghvoricca ityatroktaṁ icca kasya takārettvamiti tatpratipādakaikadeśānāṁ pratipādyaikadeśatvamabhyupagamya | tatmatenaiva titsvaritam ityatra tiditi pratyayagrahaṇamiti bhāṣye uktam | taparastatkālasya ityatra tu varṇa eva saṁjñītyuktaṁ na punastaparaḥ samudāyaḥ | yuktaṁ caitat | anyathā taparastatkālasyetyatra svaṁgrahaṇānuvṛttyā bhavadbhirityatrāpyais syāt | iyaṁ ca paribhāṣā anubandhā avayavā ityatra pakṣe ||

jñāpakaṁ cātrānekālśitsarvasya ityatra śidgrahaṇam | yadyanubandhenāpyanekāltvaṁ syāt tadā sarve ityādau śībhāvasyānekāltvādeva sarvādeśe jasaḥ siddhe śidgrahaṇamanarthakaṁ syāt | nanu dhvasoreddhāvabhyāsalopaśca iti lopaḥ śidvaktavya iti yaḥ śidabhyupagamyate tatra sarvādeśārthaṁ śidgrahaṇaṁ syāt dehi dhehīti sarvasyaiva lopo bhavati | ucyate | yadetallopasya śittvamāśritaṁ tatsāmarthyādeva sarvādeśo bhaviṣyati | atha vā lopaḥ śidvaktavya iti nāśrayaṇīyam | nānarthake'lontyavidhiriti survasyaiva lopo bhaviṣyati | yattūcyate tatrānabhyāsavikāreṣviti tallakṣyasthityā na sarvatreti ||

nanu yadi iyaṁ paribhāṣā'sti ṇal tarhi sarvādeśo na prāpnoti | ucyate | ānupūrvyāt siddhamidam | tathā hi | sarvādeśe sati ṇalo ṇakārasyopadeśe pratyayāditvamiti tataścuṭū itītsaṁjñā tatastasyānubandhatvam | tadevaṁ sarvādeśapūrvakamanubandhatvaṁ sarvādeśatāṁ vihantuṁ na kṣamate sarvādeśatāyāḥ pūrvameva niṣpannatvāt || 6 ||

varṇāśraye vidhau pratyayalakṣaṇaṁ na bhavati | tena gave hitaṁ gohitaṁ rāyaḥ kulaṁ raikulamityatra pratyayalakṣaṇenācīti avāyādeśau na bhavataḥ | lavaṇā yavāgūrityatra lavaṇāllugiti ṭhako lukikṛte pratyayalakṣaṇena ṭhagantāṭṭiḍḍhāṇañ iti ṅībna bhavati | ṅīpo varṇamātrāśrayatvaṁ yathā syādityevamarthamakārastatrānuvṛttaṣṭidādibhirviśeṣyate na tvakāreṇa ṭidādayaḥ | ata eva kvarapkhyunāmiti ṣaṣṭhyā nirddeśaḥ kṛtaḥ ||

ayaṁ cārthaḥ pratyayalope pratyayalakṣaṇam ityatra dvitīyena pratyayagrahaṇena sādhitaḥ | tathāhi tatroktam | tallakṣaṇamiti vaktavye pratyayalakṣaṇamityatra yatpunaḥ pratyayagrahaṇaṁ pratyayāśritameva kāryaṁ pratyayalakṣaṇena yathā syāt yathā suptiṅangaṁ padam iti, acītyetadvarṇamātrāśritaṁ mābhūditi | jñāpakaṁ cātra śravaṇākārttikīcaitrībhya iti śravaṇeti ṭabanto nirddeśaḥ ||

nanu yadi varṇāśraye pratyayalakṣaṇaṁ nāsti tarhi atṛṇeḍityatra tṛṇahaim iti im na prāpnoti imāgamasya halvarṇāśrayatvāt | ucyate | nāyaṁ varṇāśrayo'pi tvaṅgādhikāreṇa pratyayākṣepāddhalādipratyayāśrayaḥ ||

etaduktaṁ bhavati pratyaye dvividhaṁ kāryaṁ pratyayanimittamapratyayanimittaṁ ca tatra pratyayanimittaṁ yattadeva pratyayalopalakṣaṇena yathā syāditaranmābhūdityevamarthaṁ pratyayalope pratyayalakṣaṇamityatra dvitīyaṁ pratyayagrahaṇam | tenaico'yavāyāva ityavādirvaṇāśrayatvātparibhāṣayā khaṇḍyate imāgamastu pratyayanimitta eva aṅgādhikāreṇa pratyayākṣepāttadbhavane ko virodhaḥ | na caivaṁ śriyai idaṁ śryarthamityatrājādipratyaye iyaṅṅāśaṅkanīyaḥ | na lumatāṅgasya iti pratiṣedhāt | yattu śāsa idaṅhaloḥ ityatrāsyāḥ prāyikatvamuktā nyāsakāreṇātṛṇeḍityatra varṇāśraye'pīmāgamo bhavatītyuktam | tadupāyāntaram ||

nanu gohitamityādau luko vidhānaṁ na tu lopasya tadevaṁ pratyayalakṣaṇasya prasaṅga eva nāsti tatkiṁ paribhāsāśrayaṇena | ucyate | lukyapi pratyayalakṣaṇaṁ bhavati lopasyādarśanārthatvāt | pramāṇaṁ cātra na lumatāṅga'syeti pratiṣedhaḥ || 7 ||

kva cidekadeśo'pyanuvarttate || 8 ||

svaritatvabalena kva citsūtraikadeśaḥ padaikadeśo'pyanuvarttate | tena dāmahāyanāntācca ityatra saṅkhyāvyayāderityataḥ saṅkhyādigrahaṇamātramanuvarttate | tathā jhonta ityatrāyannādisūtrādādigrahaṇanivṛttāvapi pratyayagrahaṇamanuvarttate ||

jñāpakaṁ cātra tasminniti nirddiṣṭe pūvasya ityata iti śabde prakṛte tasmādityuttarasya iti punaritiśabdaḥ | yadi hi sahaiva padānāmanuvṛttiḥ syāt tadā nirddiṣṭagrahaṇavaditiśabdo'pyanuvarttiṣyate pūvasūtrāt | tatkiminikaraṇena | tatkurvannācāryo jñāpayati kva cidekadeśo'pyanuvarttata iti | evaṁ hi sati nirddiṣṭagrahaṇameva kevalamanuvarttate netikaraṇamiti || 8 || 

arthadgrahaṇe nānarthakasya || 9 ||

arthavadanarthakavicāre arthavata eva śabdasya grahaṇaṁ nānarthakasya | tena vanora ca ityanena kvanivvanipoḥ karṭṭṛrūpeṇārthena sārthakayoreva vano rephādeśo bhavati | dhīvarī pīvarīti | na nirarthakasya | atiśunī atiyūnīti | tathā inhanpūṣāryamṇām ityādau kvibantasyaivārthavato hantergrahaṇam | tena plīhānau plīhāna ityatrāpi niyamena dīrghavyāvṛttirna bhavati | nanu kathamatiśunītyādau vanśabdasyānarthakatvamuktaṁ yāvatā svarūpeṇārthenārthavattā'styeva | yathā vṛddhirādaic ityatroktam | saṁjñāsaṁjñisambandhātprāgvṛddhiśabdasya svarūpeṇārthenārthavattvāt prātipadikatvam | tathā cāhṛḥ | “yasminnuccarite śabde yadā yo'rthaḥ pratīyate | tamāhṛrarthaṁ śabdasya nānyadarthasya lakṣaṇa”-miti | yo hi svarūpaparaḥ prayujyate tasya svarūpamevārthaḥ tatparatvāttasya | na cātiśunītyādau vanādayo varṇasamudāyāḥ svarūpaparāḥ | atiśunyādisamudāyasaṁpādanāya teṣāmuccāraṇāt | ata evārthavat sūtre vanaṁ dhanamityatra nāntasyāvadheranarthakatvamuktam | yadā tvatiśunyādau vanādayo varṇasamudāyāḥ svarūpaparā bhavanti tadā teṣāṁ bhavatyevārthavattvamiti | āto lopa iṭi ca ityatra tu dvayorapi nirarthakasyāgamasya sārthakasya ca pratyayasyeṭo grahaṇam | iṭo't ityatra viśeṣaṇārthe ṭhakārādau karttavye yadiṭaṣṭakāraḥ kṛtastasyaitatprayojanamāto lopa iṭi cetyatra sāmānyagrahaṇaṁ yathā syāditi | etaccāto lopa iṭi cetyatra ṭita ātmanepadānāṁ ṭere ityatra ca bhāṣyakhyākhyānaṁ rakṣitenoktam | kiṁ tvevamiṭo'dityatrāpi dvayorāgamapratyayayorgrahaṇaṁ prāpnoti | tatheḍvahimahiṅityatra pratyāhārthaṁ varṇāntare karttavye ṅakārakaraṇaṁ ṅitkāryārthamapi syāt, evaṁ ca sasraṁsimaha ityatrāniditāṁ hala ityanunāsikalopaḥ prasajyeta | tadetatsamādheyam ||

puruṣottamadevena tu dādhāghvadāp ityatra dāśṭadhāvudhātvekadeśayordādhāśabdayoranarthakayoragrahaṇamuktam | tathā śe ityatra sūtre kāśe kuśe iti padaikadeśasyānarthakasya | etadanyena kṣamante | tathā hi pranidāśati pranidhāvatītyatra satyāmapi ghusaṁjñāyāṁ nergadādi sūtreṇa ṇatvaṁ nāsti dādhāśabdau prati nerūpasargasaṁjñāyā abhāvāt | tathā ca bhāṣyam | na cetau dādhau prati kriyāyoga iti | sani mīmāghu ityādau cāṅgasya ghorgrahaṇādasakārāditvācca didāśiṣatītyādau na doṣaḥ | kāśe kuśe śeśabdasya lākṣaṇikatvāt pragṛhyasaṁjñāyā abhāvo nyāsakṛtaiva śe ityatra vyākhyātaḥ |

svarūpavidhiviṣayā ceyaṁ paribhāṣā | arthavadadhātuḥ ityatrārthavadgrahaṇāt | tena pralambata ityatrānarthakādapi praśabdādavyayādāpsupa iti subluk siddho bhavati | anarthakasyāvyayatvamupasargatvaṁ prātipadikatvaṁ ca nipātānāmanarthakānāmarthavatkṛtāni kāryāṇi bhavantīti vacanāt | jñāpakaṁ cātrādhiparī anarthakau ityadhiparyoranarthakayorupasargasaṁjñānivṛttyarthaṁ nipātasaṁjñādhikāre karmarpravacanīyasaṁjñāvidhānam | ata eva nipātasya cānarthakasya prātipadikasaṁjñā vaktavyeti bhāṣye pratyākhyātam | yadyevaṁ nipātatvād yadavyayatvaṁ tatsāmarthyādeva subluk siddhaḥ | naitat | nipātatvasya svarārthatvamātreṇopapannatvāt | anarthakatvaṁ tu praśabdasya prakarṣārthasya prakarṇādināvagatatvāt | ihānarthakatvādvibhaktyabhāvo na pūrvapakṣyate prātipadikārthetyatra prātipadikagrahaṇāt tasya hyetatprayojanamanarthakādapi prātipadikamātrātprathamā yathā syāditi ||

iyaṁ ca paribhāṣā svaṁ rūpam ityatra bhāṣye jñāpitā | tatra hyuktaṁ rūpagrahaṇaṁ na karttavyam | svaṁ śabdasyetyucyamāne yadyapi śabdasya rūpamarthaśca svaṁ bhavati | tathāpi rūpameva grāhyaṁ nārthaḥ | yataḥ śabdoccāraṇe rūpapratipattirādau tato'rthapratipattiḥ | tathā śabdo'nukaraṇakāle'rthaṁ jahāti na rūpam | tadevampratyāsannabuddhitvādaheyatvena nityasambandhitvācca śabdasya rūpameva grāhyaṁ nārtho viparyayāt | ataḥ svaṁgrahaṇādeva rūpagrahaṇe siddhe vyākaraṇaśāstre rūpavadarthopyaṅgīkriyata iti labhyate ||

atha vā vraścādi sūtre bhrājagrahaṇamasyāstitve jñāpakam | yadi hyanarthakasyāpi grahaṇaṁ syāttadā rājagrahaṇenaiva bhrājaikadeśasyāpi grahaṇe siddhe rājabhrājeti bhrājagrahaṇaṁ na kuryāt | kṛtaṁ cāto jñāpakamarthavata eva grahaṇaṁ nānarthakasyeti || 9 ||

na varṇagrahaṇeṣu || 10 ||

pūrvāpavādoyam | varṇā akārādayaḥ | tadgrahaṇe'rthavarparibhāṣā nāsti | yatheko yaṇaci iti nirarthakasyāpīko nirarthake'pi yaṇ bhavati bhavatyatra bhavatviti | anyathā ṅībādisaṁbandhina eva sārthakasyekaḥ sārthake evāci yaṇ syāt kumāryauśvaśvāviti | tathā'sya ghvau iti nirarthakasyāpi bhavati | śklīkarotīti anyathā'rthavata eva viṣṇuvācakākārasya syāt | iko jhal ityatregiti yoyaṁ varṇasamudāyaḥ sa kiṁ sārthakaḥ pratyāhāro gṛhyatāṁ nirarthako vā dhāturiti vicāre yuktameva rakṣitenārthavatparibhāṣayā pratyāhāragrahaṇamuktam | yataḥ pratyāhāre vyavasthite uttarakālaṁ varṇagrahaṇaṁ na tu prathamata eva ||

nanu yadi varṇagrahaṇe'rthavatparibhāṣā nāsti kathaṁ tarhi vija iṭ ityatrārthavata iṭo grahaṇaṁ nyāsakṛtā śaṅkyate | tathā iṭot ityatra sārthakasyeṭo grahaṇamabhidhīyate | kathaṁ vā sīyuḍāgame kṛte kevalasyeṭaḥ sārthakatvam sasīyuṭkasyaivārthavattvāt, yathā bhindyurityatrosa ānarthakyamuktam | kathamiḍgrahaṇe'rthavatparibhāṣābhidhīyate yāvatā āto lopa iṭi ca ityatroktamiḍvahimahiṅityatra ṭhe karttavye ṭitkaraṇamāgamapratyayayorubhayorapi grahaṇārthamiti | tadevaṁ sāmānyagrahaṇenaiva bhavitavyam | ucyate | yattāvaduktaṁ varṇagrahaṇamidam | tanna | yato yatrānubandhamuccārya kāryaṁ vidhīyate tatra varṇāśritaḥ pratiṣedho na bhavati | atra ca graho'liṭi dīrgha ityatreḍapavāde īṭi karttavye'grahīdityatra sthānivadbhāvena iṭa īṭi iti sico lopārthaṁ yadetatkṛtaṁ dīrghagrahaṇaṁ tadetatsāmānyajñāpakam | tena yatrānubandhopādānaṁ tatra na varṇagrahaṇeṣviti na pravarttate | yadyevamiko yaṇaci ityatrāpyanubandhopādānādanayā nopasthātavyam | naitadasti | kakārādīnāṁ samudāyānubandhatvādigiti nekārādīnāṁ sānubandhānāmupādānam | samudāyānubandhānāmavayavānubandhatā na svīkriyate | karmeṇiṅ iti ṅakāreṇa saṅiti pratyāhāraṁ kṛtvā saṅantā dhātava iti karttavye sanādyantā dhātava iti jñāpakāt | tato na sasraṁsimaha ityatrānunāsikalopo bhavati | kuruta ityatra tu ñittvādātmanepadaṁ gandhanādisūtrādanantaraṁ nānuparābhyāmiti karttavye'nuparābhyāṁ kṛña iti yatkṛtaṁ tatsvaritañita ityasyāpi pratiṣedho bhavatīti jñāpanārtham | tadevaṁ kṛño ñakārasya samudāyānubandhatve'pyavayavānubandhatvamiti | yastu svādi sūtre auḍasiti kṛte ḍitvāṭṭilopo doṣa uktaḥ | so'nuparābhyāṁ kṛña ityasya sāmānyajñāpakatvamabhyupagamya boddhavyaḥ | yadapyuktaṁ sāgamakasyaivārthavattvamiṇmātraṁ tvanarthakamiti | tadapi na | prakriyākrameṇāgamāstadguṇībhūtāstadgrahaṇena gṛhyante ityāśrayaṇāt | bhindyuḥprastāve tvanāgamakānāṁ sāgamakā ādeśā bhavantītyāśritam | yaccāpyuktaṁ ṭhe karttavye ṭittvātsāmānyagrahaṇamityādi | tadapi na | sati prayojane jñāpakāt pratyayāgamayorgrahaṇamucyate | vija iṭ ityitra na kiṁ cidāgamasya ṅittve prayojanam | atannimittatvād guṇasya | iṭot ityatra ca prākaraṇikasyeṭo'dādeśavidhānātkuta āgamaprasaṅgāśaṅketi ||

jñāpakaṁ cātroña iti sūtram | yadyarthavatparibhāṣā varṇagrahaṇepi syāttadā u itītyatretiśabdekāre'narthake'rthavatparibhāṣayaiva yaṇādeśāprasaṅgaḥ siddha ityuña iti pragṛhyasaṁjñā na kṛtā syāt | kṛtā cāto jñāpakam ||

atha vā bhakṣyeṇa miśrīkaraṇam iti nirddeśe jñāpakaḥ || 10 ||

bhāvyamāno'ṇ savarṇānna gṛhṇāti || 11 ||

vidhīyamāno'ṇ savarṇānāṁ grāhako na bhavati | tenehetidama iś iti trimātrasya sthānina āntaratamyāt trimātra ādeśo na bhavati | tathā he anaḍvan ityatrāmsaṁbuddhau iti dīrgho na bhavati | lavitā lavitumityatra vṝto vā itīṭo vikalpena dīrghavidhānādiṭo na sarvarṇagrahaṇamityāhaḥ ||

iyaṁ ca paribhāṣā aṇuditsarvaṇasya cāpratyaya ityatrāpratyaya ityasyaivārthaḥ paṭhyate | tathā hi | pratyāyyate vidhīyate bhāvyate iti pratyayaḥ na pratyayo'pratyayaḥ, abhāvyamāna ityarthaḥ apratyayo'ṇ sarvarṇān gṛhṇātītyasminnarthe bhāvyamānoṇ savarṇānna gṛhṇātīti vyaktamavatiṣṭhate ||

sukhapratipattyarthaṁ jñāpakamapi ke cidāhaḥ | īhalyaghoḥ iti dīrghekāravidhānam | anyathā dīrghasya sthāne sāvarṇyārddirgha eva syāt ||

anityā ceyaṁ paribhāṣā | tenāmū ityatra dvimātrasyaukārasya dvimātra evokāro bhavati | atra cārthe diva ut iti taparakaraṇaṁ jñāpakam | yadi bhāvyamāno'ṇ sarvathaiva savarṇānna hṛhṇāti tadā dyubhyāmityatra cchroḥ śūḍanunāsike ca ityūdyapi kṛte dīrghasya sthāne hrasvaḥ siddhaḥ syāt kiṁ tapakaraṇena | tatkṛtaṁ jñāpayati kva cidbhāvyamāno'ṇ sarkṇan gṛhṇātīti | śāsa idaṅ haloḥ iti taparakaraṇaṁ vā jñāpakamiti || 11 ||

yasminvidhistadādāvalgrahaṇe || 12 ||

yasminniti saptamḻnirdiṣṭe algrahaṇe varṇagrahaṇe yo vidhiḥ sa tadādau samudāye bhavati na tadante ||

tena pivatereśi pape ityatra pāghrādi sūtreṇa pivādeśo na bhavati | tathā'cīti iyaṅṅuvaṅāvajādau bhavataḥ, śriyo luluvartululuvuriti | śriyau luluva ityatrāpi vyapadeśavadbhāvāt | yadi hyatra tadantavidhiḥ syāt śriyo luluvaturityatra na syāt halantatvāt ||

ayaṁ cārtho yena vidhi sūtre tadantavidyapavādastadādividhirupasaṁkhyātaḥ paribhāṣārūpeṇa padyata iti || 

vāmanena tu guṇo'pṛkta ityatrāpṛktagrahaṇādiyaṁ varṇitā | taduktam | uto vṛddhirluki halītyanuvarttamāne halādau guṇe prāpte'pṛktagrahaṇaṁ halmātra eva yathā syāddhalādau mābhūdityevamarthaṁ kriyamāṇaṁ jñāpayatyastīyaṁ paribhāṣā yasminvidhirityādi | tena halītyanuvṛttau halādau syāt | apṛktagrahaṇe tu varṇamātra eva bhavati praurṇoditi |

yadyevaṁ kṅiti saṁprasāraṇaṁ kṅādāveva syād gṛhīto gṛhītiriti | yagādau na syād gṛhyata iti | ucyate | kṅitīti nedaṁ varṇagrahaṇamiti kṅāvitau yasyeti bahubrīhiṇā varṇasamudāyasya parigrahāt || 12 || 

vidhividhānavidhibhājāṁ trayāṇāṁ saṁnidhāne tadantavidhirbhavati || 13 ||

tena erac itīvarṇāntādattpratyayo bhavati | iyaṁ paribhāṣā yena vidhi sūtrasyaiva sāmarthyāllabdho'rthaḥ padyate | tathāhi | yeneti karaṇe tṛtīyā na cākartṛkaṁ karaṇamastīti karttāpyāśritaḥ | sa punariha saṁbandhiśabdatvādantaśabdenāvayavavācinā sannidhāpitaḥ samudāyo vijñāyate | sa ca karttā tribhiḥ prakāraiḥ sannihito bhavati | kva cinnirddeśāt | yathā īdūdeddvivacanam iti dvivacanaṁ karttṛbhūtaṁ nirdiṣṭaṁ yattadīdādibhiḥ karaṇaiḥ pragṛhyasaṁjñāṁ vidadhāti | kva citprakaraṇāt | yathā erac ityatra dhātorityadhikārāt prakaraṇāddhātuḥ karttā saṁnidhāpitaḥ sa ikāreṇa karaṇenācaṁ vidadhāti | kva citsāmarthyāt | yathā iko jhal ityatra dhātoreva ca san vidhīyate iti sāmarthyāddhātuḥ karttā saṁnidhāpita ikā karaṇena sanaḥ kittvaṁ vidadhāti | tadevamīdūdeddvivacanamityādau pragṛhyasaṁjñāyā vidhīyamānasya karmaṇo vidherīdūdetaḥ karaṇasya vidhānasya dvivacanasya ca kartturvidhibhājaḥ saṁbhavādyena vidhistadantasyeti tadantavidhirvidhīyate | tadevaṁ yena vidhiḥ ityasya sūtrasyārtha evāyamevaṁvidho vidhividhānavidhibhājāṁ trayāṇāṁ sannidhāne tadantavidhirbhavati | eco'yavāyāva ityādau vidhibhājo'saṁbhavānna pravarttate | nanu śabdānuśāsanaprastāvācchabdarūpaṁ karttṛ vidhibhāk syāt tatkathaṁ kartturabhāvo'bhidhīyate | ucyate | śabdarūpaṁ kartṛtvena nāśrīyate atiprasaṅgāditi suptiṅantaṁ padam ityatra rakṣitena vyākhyātam | tenaico'yavāyāva ityādau śabdarūpasyāsvīkāradejmātrasyaiva sthānitvamajmātrasya paratvaṁ naijantasyājādāviti | tasya sthānitve vṛkṣāvatretyādāvāvādayo'nekālatvātsarvādeśāḥ syuḥ | nanu nirddiśyamānasyādeśā bhavantītyeca eva sthāne ādeśena bhavitavyaṁ naijantasya | satyametadvyaktau jātau tu doṣaḥ | anyastvāha | varnavidhitvamalvidhīnāṁ na syāt | tathā na yena vidhi sūtre bhāgavṛttikṛtoktam | iko yaṇaci itīkā acāvayavenāvayavinaḥ samudāyasya saṁnidhāpitatvādigantasyājādau yaṇādeśa iti varṇavidhireva na syāt tiṣṭhatu dadhyaśāna tvaṁ śākeneti | kiṁ tu satyapogantasyājādau yaṇādeśe padavidhitvaṁ na bhavatyeva padasya padāt supsupetyādyanuccāraṇena ṣaṇādeśādikāryāṇāṁ vidhānāditi || 13 ||

iti mahāmahopādhyāyaśrīsīradevakṛtāyāṁ paribhāṣāvṛttau prathamaḥ pādaḥ || 1 || 

ekayoganirddiṣṭānāṁ saha vā pravṛttiḥ saha vā nivṛttiḥ || 14 ||

ekayoganirddiṣṭānāṁ padānāṁ pravṛttirvā nivṛttirvā sahaiva syāt | na tvekasya pravṛttiraparasya nivṛttiḥ ||

tena uśca ityatra liṅsicāvātmanepadeṣvityetatsarvamanuvarttate | tadayamarthaḥ | ṛvarṇāntāddhātoḥ parau liṅsicāvātmanepadeṣu kitau bhavata iti | tatra hi ṛ iti ṛvarṇānto dhāturgṛhyate na ṛ gatāviti | atra nyāsakāraḥ kāraṇamāha | śailīyamācāryasya yatrāsya dhātorgrahaṇamicchati tatrāvaśyaṁ śtipā nirddeśaṁ karoti | yathā'rttipiparttyīśca sarttiśāstyarttibhyaśca iti | atra ca nyāse sandehavicchedāyetyadhyāhāryam | tenāyamarthaḥ | yatrāsya dhātorgrahaṇamicchati tatra sandehavicchedāyāvaśyaṁ śtipā nirdeśaṁ karoti | yatra na sandehastatra karoti na karoti ca | evaṁ ca smipūṅrañjvaśāṁ sani ityatra ṛgatāvityasya grahaṇe'pi na śtipā nirddeśaḥ | tatra hi kiraśca pañcabhya ityatra dṛṅdhṛṅorgrahaṇānna sandehaḥ | anyathā didiriṣate didhariṣate ityatra smipūṅrañjvaśāṁ sani ityeveṭaḥ siddhatvāṭḍhṛṅdhṛṅorgrahaṇamanarthakaṁ syāt | yattu tatra rakṣitenoktam | saṁdehavicchedāyetyatrādhyāhāryam | tataśca śmipūṅrañjvaśāṁ sani ityatrāvirodhaḥ | kiraśca pañcabhya ityatra kṛgṛsvīkāra eva viccheda heturiti | tadayuktam | yato vṝto vā ityanuvṛtto iṭ sani vā iti vikalpeneṭi prāpte nityamiṭo vidhānārthaṁ kṛgṝgrahaṇaṁ syāt | ucyate | yadi nityamiṭo vidhānārthaṁ kṝgṝgrahaṇaṁ syāt tadā kiraśca pañcabhya iti sūtramakṛtvā smipūṅrañjvaśkṛgṛpracchāṁ sanītyevaṁ kuryāt | na cottaratra rudādibhyaḥ sārvadhātuke ityatra pañcabhya ityasya prayojanamastīti vācyam | rudādipañcadhātuparigrahārthaṁ tatra vṛtkaraṇaṁ karttavyaṁ tata eva vyavasthā bhaviṣyati | atha vā kṛgṛsvīkāra iti bahubrīhirayaṁ kṛgroḥ svīkāro yasminniti kṛgṛsvīkāraḥ kiraśca pañcabhya iti yogastasminkṛgṛsvīkāre kiraśca pañcabhya iti sūtra evāntarbhūtayorddaṅdhṛñorgrahaṇaṁ vicchedaheturityarthaḥ | atha vā smipūṅrañjvaśāṁ sani ityatra ṛgrahaṇaṁ hrasvāntārthaṁ tāvanna bhavati dṛṅdhṛṅgrahaṇāt | dīrghantādapi yadi iṭ sani vā iti vikalpaḥ syād dīrghārthamapi na syānnityavikalpayorvirodhāt | evaṁ ca ṛgrahaṇamanarthakaṁ tasmādiṭ sani vā ityatra ṛgrahaṇaṁ nānuvarttate vṛṅvṛñāvevānuvarttate vṛṅvṛñoreveḍvikalpaḥ ṛtāṁ tu smipūṅrañjvaśāṁ sani ityanenaiva nityamiṭ siddha iti kṛgṛgrahaṇameva vicchedaheturiti ||

jñāpakaṁ cātra hanaḥ sic iti sijgrahaṇam | yadyekasūtranirddiṣṭayorapi padayorekamanuvarttate nāparamiti tadā liṅsicāvātmanepadeṣu ityato liṅgrahaṇaṁ nānuvarttiṣyate sijgrahaṇamevānuvarttiṣyata iti sijgrahaṇamanarthakaṁ syāt | ayaṁ ca svaritatvalabdho'rthaḥ paribhāṣārūpeṇa paṭhyate | ata evopadeśe'janunāsika it ityato laśakvataddhita ityatra idgrahaṇānuvṛttāvapi anunāsikagrahaṇaṁ nānuvarttate || 

upadeśagrahaṇānuvarttanaṁ prati rakṣitānunyāsayorvivāda eva | tathāhi | gāṅkuṭādi sūtre'nunyāsakāreṇoktamādeśapakṣe idgrahaṇamanarthakamāderhi bhavato laśakvataddhita ityanenaivetsaṁjñāyāḥ siddhatvādityādi | rakṣitena tūktamādibhūto ṅakāro laśakvataddhita ityatropadeśagrahaṇānuvṛtterasatīdityetasminnetsaṁjñaka iti na jñāpakamidityetadādeśābhāvasyeti | tatrāyaṁ rakṣitābhiprāyaḥ | laśakvataddhita ityatrāsatyupadeśādhikāre niśśabdātsaptamībahuvacane nicśvityatra śakārasyetsaṁjñ syāt | na cetsaṁjñāyāṁ karttavyāyāmasiddhatvamasti | sasajuṣoruḥ ityatra rorukārasyānunāsikyapratijñānasamarthyāt, riṅśayagliṅkṣu iti nirddeśācca sāmānyenetsañjñāyāṁ karttavyāyāmasiddhatvāpravarttanasya jñāpitatvāt | tathā bhiyaḥ kruklukanau iti bholuka ityatra klukanaḥ kakāre lupte lakārasyetsañjñā syāt | naitadasti | prayojanābhāvādevetsañjñāyā apravṛttiḥ | svarastu na prayojanaṁ nittvādeva tasya siddhatvāt | evaṁ tarhi yaṅluki bebhīluka ityatra svaraḥ prayojanam | tathāhi | nittvādekāra udātto bhavati littvādīkāraḥ syāditi | anunyāsakārasyāyamabhiprāyaḥ | nicśvityatretsañjñā na bhavivyatyasiddhatvāt | yattūktaṁ rorukārasyānunāsikyapratijñānasāmarthyālliṅkṣviti nirddeśāccāsiddhatvaṁ na bhavatīti | tadupadeśe'janunāsika it, halantyam ityetsūtradvayakarttavyatāyāmevāsiddhatvaṁ na bhavati tatraiva pramāṇasambhavāt | anyatra tvasiddhatvameva | bebhīluka ityatra yaṅlukaśchāndasatvāditsañjñā na bhaviṣyatīti | yadi vā lakārasyetsañjñāyāṁ yaṇādeśe kṛte bebhyuka ityeka evājiti kva litsvaraḥ syāt | nicśviti jastvena śakārasya jakāraḥ ścutvena sakārasya śakāraḥ svari ca iti cartvaṁ jakārasya cakāraḥ | nanu stoścunā ścuḥ ityatra rakṣitenoktaṁ jhalāṁ jaś jhaśi iti nirddeśāt śakārasya jaśtvaṁ nāsti | ata eva masjinaśorjhali ityatra majjatisiddhaye jaśtvena sakārasya dakārastasya bhṛjjati iti nirdeśādasiddhatvābhāvāt ścutvena jakāro nyāse uktaḥ | anyathā ścutvena sakārasya śakāre kṛte jastvena jakāre siddhe bhṛjjati iti nirddeśādasiddhatvābhāvapravarttanamayuktam | evaṁ ca kathamatra jaśtvena śakārasya jakāraḥ | ucyate | jhalāṁ jaś jhaśi ityatra cavargaparasya śakārasya jaśtvābhāvādanyatrāpi cavargaparasyaiva jaśtvābhāvastulyajātīyatvāditi yathā kathaṁ cit jñāpakasiddhaṁ na sarvatreti vā || 14 ||

uṇādayo'vyutpannāni prātipadikāni || 15 ||

ayaṁ cārtho'rthavat sūtrapraṇayanādastītyāhuḥ | anyathā sarveṣāmuṇādīnāṁ dhātujatvena kṛdantatvāt prātipadikasaṁjñāsiddhau tanna kuryāt | anye tvataḥ kṛkami ityatra kamigrahaṇaṁ kṛttvā kaṁsagrahaṇādetāmāhuḥ | tena kṛgṛkuṭividibhidibhyaśca iḥ kiditīkārapratyayāntayoḥ kirigiriśabdayorosi yaṇādeśe kṛte dhātutvābhāvāddhali ca iti dīrghatvanna bhavati kiryoḥ giryoriti | etacca na samyak | acaḥ parasmin iti sthānivatvāddīrghatvāprasaṅgāt | na cāsti dīrghavidhiṁ prati na sthānivaditi | svaradīrghayalopeṣu lopājādeśo na sthāvaditi vacanāt | yathā pratidīvneti | evaṁ tarhi jīryaterdhātorjīyateḥ krin raśca va iti krin pratyaye ittve raparatve ca rephasya vakāre kṛte jivririti dhātutvābhāvāddīrgho na bhavatīti || 15 ||

sarvo dvandvo vibhāṣayaikavadbhavati || 16 ||

tena bābhravāśca śālaṅkāyanāśca bābhravaśālaṅkāyanaṁ bābhravaśālaṅkāyanā ityekavacanaṁ bahuvacanaṁ copapannaṁ bhavati | yadyeva samāhāhāradvandve'pi vāktvacaṁ śrīsrajam ityatrāpi dvivacanaṁ prāpnoti paśce tathetaretarayogadvandve'pi pakṣe ekavacanaṁ syāt | ucyate | sarvo dvandva ityanena samāhāradvandvastathetaretarayogadvandvaśca nāpūrvatayā vibhāṣaikavat kriyate kiṁ tarhi nyāyasiddho'nūdyate | tathāhi | cārthe dvandva ityanena cārthe dvandvaḥ kriyate cārthaścetaretarayogaḥ sa eva yadodriktāvayavabhedo bhavati tadāvayavabhedānugamād dvivacanabahuvacane siddhe eva yadā tu tirohitāvayavavivakṣā saṁhatiḥ pradhānamiti yāvat tadā samāhāra iti tatra saṁhatipradhānatvādekavacanamiti | tadevaṁ cārthe eva sarvo dvandvo vibhāṣayaikavadbhavatīti paribhāṣārūpeṇa paṭhyate | nanu cārthaḥ samuccayo netaretarayogaḥ | caśabdaprayoge samuccayasyaiva pratīteḥ | satyametat | kiṁ tu tatprabheda evetaretarayogo na tu samuccayādayaḥ | tathāhi | samuccaya eva yadā yugapadarthābhidhāyināṁ parasparāpekṣāṇāṁ padānāṁ bhavati tadā dvandvaḥ kriyate | etāvataivetaretarayogaścārtha evetyucyate | nanu yadi cārthaṁ evāyaṁ sarvo dvandva ityādi kimarthaṁ tarhi tiṣyapunarvasvoḥ ityatrā'sya bahuvacanagrahaṇaṁ jñāpanārthaṁ nyāsakṛtābhidhīyate | tiṣya ekaḥ punarvasū ca dvau iti bahutvādbahuvacanaṁ siddhameva ekavacanasya prasaṅga eva nāsti | bahuvacanaprsaṅge eva dvivacanaṁ bhaviṣyati kiṁ bahuvacanasyetyanena | tatkṛtaṁ jñāpayati | astīyaṁ paribhāṣā sarvo dvandva ityādi | ucyate | jñāpayati bodhayati jñāpakaṁ bodhakam | kasya bodhakam | abhimatasya niyamasyeti | kvābhimataniyamaḥ | dvandvaśca prāṇitūryasenāṅgānām ityatra samāhāre eva prāṇyaṅgādīnāmiti | prāṇyaṅgādīnāmeva samāhāre nānyeṣāmiti viparītaniyame hi tiṣyapunarvasūnāṁ sarvadā itaretarayoga eva dvandvaḥ syānnasamāhāre | evaṁ ca bahuvacanaprasaṅga eva dvivacanamiti gahuvacanagrahaṇamanarthakaṁ syāt | etacca dvandvaśca prāṇitūrya ityatra prāṇyaṅgādīnāmeva samāhāra ityevaṁ viparītaniyamo nāśrīyate tiṣyapunarvasvornakṣatradvandve bahuvacanasya iti bahuvacanagrahaṇādityādina granthena rakṣitena vyākhyātam | nanvevaṁ dvandvaśca prāṇitūrya iti sūtramanarthakaṁ syāditi | tena hi samāhāre evaikavadbhāvo vidhīyate | tatra samāhāradvandvaikatvādekatvādekavacanaṁ siddhameva | ucyate | prāṇyaṅgādīnāṁ samāhāra eva dvandvo yathā syāditaretarayogo mābhūditi sūtraprayojanam | nanu kimarthaṁ samāhāra ekavattvaṁ kriyate netaretarayoga evaikavadbhāvaḥ kriyatām | evaṁ ca samāhāradvandvagrahaṇaṁ prayatnapratipādyaṁ na bhavati karyaṁ ca vidhimukhenaiva pravarttate | ucyate | itaretarayoga evaikavadbhāve satyasthitvacamityatra samāhāralakṣaṇo dvandvāccudaṣahāntātsamāhāra iti ṭac syāt | nanvevamapi pūrvoktaprakāreṇa samāhāra evaikavadvacanaṁ bhavati samāhāraścaika eva | evaṁ caikavaditi vatirnopapadyate na hyeka evaikavadbhabhavati | ucyate | buddhyānekatvamāropya vatirbhaviṣyati | uktaṁ ca | buddhirhi bhagavatyabhede'pi bhedaṁ janayati | yathā rāhoḥ śira iti | atha vā nāyaṁ vatiḥ kiṁ tarhi vadervijanto'yamekavaditi | nanu ca tathāpyaśeṣadvandva ekatvāvidhānāt sarvaśabdārtho'ghaṭamānaḥ syāt | ucyate | sarvo dvandva iti korthaḥ | itaretarayogasamāhārātmaka ityarthaḥ | nanvevamapi vibhāṣā vṛkṣamṛgādi sūtramanarthakam | anayaiva paribhāṣayā bābhravaśālaṅkāyanaṁ bābhravaśālaṅkāyanā itivat plakṣanyagrodhaṁ plakṣanyagrodhā ityevamādīnāṁ siddhatvāt | ucyate | siddhe paribhāṣayaikatve vṛkṣādīnāṁ sajātīyaireva dvandva ekavadyathā syāt, na vijātīyairiti vyatikaranirāsārthaṁ vibhāṣayaikavadvidhānamiti | tena paśvādīnāṁ vijātīyairdvandva ekavanna bhavatītītaretarayogo'sau dvandvao bhavati | tathā ca bhaṭṭiḥ | naravānararakṣāsāmiti || 16 ||

iti mahāmahopādhyāyasīradevakṛtāyāṁ paribhāṣāvṛttau gāṅkuṭādipādaḥ || 2 ||

ūditsavarṇaṁ gṛhṇāti na savarṇamātram || 17 ||

udidvarṇo'ṇuditsavarṇasya iti sthānaprayatnābhyāṁ viśiṣṭameva savarṇaṁ gṛhṇāti na savarṇamātram | tena coḥ kuḥ iti kugrahaṇe hakārasya grahaṇaṁ na bhavati ||

jñāpakaṁ cātra na vibhaktau tusmā ityatra tugrahaṇaṁ kṛtvā sakāragrahaṇamiti | ayaṁ ca nyāyasiddha evārthaḥ sukhapratipattyarthaṁ jñāpakenokaḥ | tathāhi | sthānaprayatnābhyāṁ sadṛśasya savarṇasaṁjñā vidhīyamānā takārasakārayoḥ sparśovāṇoḥ prayatnabhedādeva sāvarṇyaṁ nāstīti tat kuto jñāpakam | yata eva sthānaprayatnābhyāṁ sādṛśyāt sāvarṇyamata evāi uṇiti sūtre vṛttikṛtoktam | hrasvamavarṇaṁ prayoge saṁvṛtam | dīrghaplutayostu vivṛtatvam | teṣāṁ sāvarṇyaprasiddyarthamakāra iha śāstre vivṛtaḥ pratijñāyata iti | tatraika nyāsakāreṇoktam | vivṛtataraḥ pratijñāyata iti draṣṭavyam | anunyāsakāreṇa tu vivṛtatamaḥ pratijñāyata iti draṣṭavyamityuktam | anyathā ākārasya vivṛtatamatvādakārasya vivṛtataratvapratijñāne satyapi sāvarṇyaṁ na syāt | nyūnādhikaprayatnatvāt | nyūnādhikaprayatnānāṁ ca sāvarṇyaṁ nāstyeva | tathā ca jājjhalau iti sūtre śakārasya sāvarṇyenāctvābhāvārthaṁ bhāṣyakāreṇoktam | spṛṣṭaṁ karaṇaṁ sparśānām, īṣatspṛṣṭamantasthānām, vivṛtaṁ karaṇamuṣmaṇām, īṣadityanuvartate, svarāṇāṁ ca, vivṛtamityanuvarttate īṣaditi nivṛttamiti | etenekāraśakārayorvivṛteṣadvivṛtayoḥ sāvarṇyābhāva uktoṁ bhavati | evaṁ ca nā'jhalau ityasyāpi prayojanaṁ na dṛśyate | dadhi śītamityādau nyūnādhikaguṇatvādeva sāvarṇyābhāvāt | nyūnādhikaguṇānāṁ ca sāvarṇyābhāvo'vaśyamevāṅgīkarttavyaḥ | anyathā eṅaḥ padāntādati ityādau ekāraukārābhyāṁ sāvarṇyādaikāraukārayorapi grahaṇaṁ syāt | rakṣitena tu eṅa ityatra eoṅṅakāreṇa praṭyāhāragrahaṇasāmarthyāt sāvarṇyābhāva uktaḥ | anyathā aikāraukārayorapi grahaṇe eca iti cakāreṇa pratyāhāragrahaṇaṁ kuryāt | kiṁ tvevaṁ yatra svarūpeṇaikāra upādīyate tatra sāvarṇyaṁ syāt | īdūdeddivacanam iti | atra ekāreṇa aikārasya grahaṇe sāvarṇyabhāvātkaravāvahāyitītyatrāpi pragṛhyasaṁjñā syāt | na cātra taparakaraṇātsāvarṇyābhāvo vācyaḥ | taparakaraṇasya prayojanāntarābhāvena vṛttinyāsayornirdeśārthatvena vyākhyātatvāt | yadyevamiṇkoḥ ityatra kathaṁ nyāsakāreṇa dāsyatītyatra ākārahakārayornyūnādhikaguṇayoḥ sāvarṇyāt ṣatvaprāptimuktā vayasyāsu iti nirddeśād vyavasthoktā | tathāhi | hakārasya vivṛtvam | ākārasya vivṛtatamatvam | yadāha śikṣākāraḥ | vivṛtaṁ karaṇamūṣmaṇāṁ svarāṇāṁ ca, tebhya eṅau vivṛtatarau, tābhyāmapyeau, tābhyāmapyākāra iti | atrāhuḥ | vivṛtaṁ karanamūṣmasvarāṇāmityekapade karttavye yadvivṛtaṁ karaṇamūṣmaṇāṁ svarāṇāṁ ceti pṛthak padaṁ kṛtaṁ tataḥ svarāṇāmityasyaivottaratra sūtre sambandha iti | tena svarāpekṣamevākārasya vivṛtatamatvaṁ noṣmāpekṣamata ākārahakārayoṣtulyaprayatnatvād dāsyatītyatra nirddeśāt ṣatvābhāvo yukta evābhihitaḥ | rakṣitena tu iṇkoḥ ityatra nyūnādhikaguṇasyāpi sāvarṇyamuktam | nanu dāsyatītyādāvākārahakārayorajjhaltvānnājjhalau iti sāvarṇyapratiṣedhādeva mūrddhanyo nāsti tatkimiti nirddeśena vyavasthocyate | ucyate | nājjhalau ityagṛhītasavarṇānāṁ pratiṣedho vaktavya iti vacanāt | ākārastu gṛtasavarṇaḥ | tatkato'tra pratiṣedhaḥ | nanu kimarthamagṛhītasavarṇanāṁ pratiṣedha ucyate na sāmānyenaiva pratiṣedho'stu tena dāsyatītyādau sāvarṇyābhāvo nājjhalau iti niṣedhādeva sidhyati | tathā khaṭvā hastaḥ kumārī śete ityādāvakaḥ savarṇe dīrghatvābhāvārthamacītyanuvarttanīyaṁ na bhavati | ucyate | yadi gṛhītasavarṇānāmapi nājjhalau iti pratiṣedhaḥ syāt tat niṁssa ityatra jharo jhari savarṇa iti pakṣe sakāralopo nasyāt | nṛkāreṇācā savarṇasya sakārasya grahaṇāt tasyācthalyupadeśāddhaltvamajjhalornājjhalau iti pratiṣedhāt | na ca lṛkārasakārayornājjhalau iti savarṇasaṁjñāniṣedhaḥ śakyate karttum | ātmani kriyāvirodhāt | tathāhi | lṛkārasakārayornājjhalau iti pratiṣedhena sakārasyāctvābhāvāt | lṛkārasakārayornājjhalau iti niṣedhī nopapadyate | evaṁ cātmana eva ātmanā pratiṣedhaḥ kṛtaḥ syāditi | agṛhītasavarṇānāṁ pratiṣedhaśca nājjhalau ityatra savarṇasaṁjñāpratiṣedhavākye savarṇasaṁjñāyā anabhinirvṛttatvena grahaṇakaśāstrasyānabhinirvṛttatvāt | evaṁ hyuktaṁ pūrvaṁ hyapavādāḥ pravarttante paścādutsargā iti || 17 ||

prakṛtivadanukaraṇaṁ bhavati || 18 ||

tena kaścidāha dviḥ paṭatīti | tamanyo'nukaroti dviḥ paṭatītyāheti | tatra prakṛtivadbhāvātpadatve tiṅṅatiṅa iti nighātaḥ siddho bhavati | padatvābhāve sa na syāt | tathā vṛṣaṇvasvaśvayorityatra nalopābhāvaṇatve bhavataḥ || 

jñāpakaṁ cātra parivyavebhyaḥ kriya ityādau nirddeśe kriāderanukaraṇaśabdasya vibhaktyutpattyarthaṁ prātipadikasaṁjñābhyupagame'pi dhātutvāśrayasyeyaṅādeśasya karaṇam ||

yadyevaṁ kathaṁ viparābhyaṁ jeḥ ityādinirddeśaḥ | na cātra vidyamāno'pīyaṅādeśaḥ paratvād gherṅiti iti guṇena bādhyate iti śakyate vaktum | kṣiya iti nirddeśātparamapi guṇaṁ bādhitvā iyaṅeva bhavati pūrvavipratiṣedheneti rakṣitena vyākhyātatvāt | evaṁ ca kṣiyo ḍhīrghāt ityatra dīghagrahaṇamupapadyate | anyathā hi kṣiya itīyaṅā nirddeśādeva dīrghaparigrahe siddhe dīrghagrahaṇamanarthakaṁ syāt | ucyate | dvividhamanukaranam | sārthakasya nirarthakasya ca śabdamātrasya | tadevaṁ kriya ityādau sārthakasyaiva labdhadhātuvyapadeśasya krītyasyānukaraṇam | tatra dhātukāryasyeyaṅo vidyamānatvādanukaraṇe'pi tadbhavati | viparābhyāṁ jeḥ ityādau nirarthakasya varṇasamudāyamātrasyānukaraṇaṁ tatra ca kriyārūpasyārthasyābhāvāddhātusaṁjñaiva nāsti | evaṁ cānukārye eva dhātusaṁjñāyā abhāvādiyaṅādeśo nāsti tadanukaraṇe kā punaḥ kathā | tadevaṁ dvividhamanukaraṇamiyaṅaḥ karaṇākaraṇābhyāmavadhāryate | ata eva paṭhanti | sārthakānukaraṇe prakṛtivadanukaraṇaṁ bhavatīti | nanu yadi jeriti nirarthakasyānukaraṇaṁ kathaṁ tarhi jayaterdhātorātmane padaṁ bodhyate | ucyate | sāmānyasya viśeṣagrahitayā dhātorapi pratipādanāt | nanu yadi prakṛtivadbhāvād dhātukāryamiyaṅ tadā'dhāturiti prātipadikasaṁjñāpratiṣedhaḥ prāpnoti | ucyate | adhāturiti nāyaṁ prasajyapratiṣedho dhātorna bhavatīti kiṁ tarhi paryudāsaḥ | dhātoranyatra bhavatīti | krīprabhṛtayaśca śabdā anukaraṇatvenādhātavaḥ prakṛtivattayā ca dhātava iti dhātvadhātutvāddhātoranya eva bhavanti | tathā ca kṣiyo dīrghāt ityatra kṣiyaḥ svāśrayā prātipadikasaṁjñā bhaviṣyatīti nyā vyākhyātam | atha vā paryudāse'dhāturiti nedaṁ śāstrīyaṁ kāryam tastatkarttavyatāyāṁ na prakṛtivadityatideśaḥ | paryudāse nañityeta ccārthavadadhāturapratyayaḥ prātipadikam ityatra kṣiye dīrghāt ityatra ca rakṣitenoktam | nanvevamapyanarthaka tvādanukaraṇaśabdasya prātipadikasaṁjñā na prāpnoti | na cānukā evārthaḥ | bhedābhāvāt | bhede hi sati vācyavācakasaṁbandhaḥ | cānukaraṇaśabdasyānukāryaśabdātkopi bhedo'vadhāryate | tathāpi bauddho bhedaḥ syāt | evamapi anukāryasya vācyasya śabdātmakatvādanukaraṇasya vācakasya na tadabhidheyatvamupapadyate | na hi śabdasya śabdāntaraṁ vācyaṁ kiṁ tarhyartha eva | naidasti | śabdo'pi śabdasya vācyo dṛśyo | yathā bhūvādiśabdo dhātuśabdasyeti | nanu yuktaṁ tat | ācāryeṇa saṁjñāvidhānāt | evaṁ tarhi anukaraṇamapyanukāryasya vācakaṁ yuktam | ācāryasya tathā vyavahārāt | vācyavācakabhāve vyavahāra eva hi nibandhanam | nanvevamapi satyapyarthavattve'nukaraṇādvibhaktirna prāpnoti saṁkhyāyāṁ sāvidhīyate | na cānukāryeṣu śabdeṣu dravyasamavāyinī saṁkhyā saṁbhavati | teṣāṁ śabdātmakatvenāṁvaraguṇatve satyadravyatvāt | saṁkhyāpi guṇa eveti na tatrāsāvasti | nirguṇā guṇā iti vacanāt | ucyate śabdasyedaṁ taditi sarvanāmaparāmarśayogyatvād dravyatvamiṣyate | tasmātsiddhānukaraṇaśabdādvibhaktiḥ || 18 ||

vikaraṇebhyo niyamo balīyān || 19 ||

śabādivikaraṇāt prāganudāttaṅita ātmane padam ityādīni niyamaśāstrāṇi tāvadbhavanti tato vikaraṇāḥ | tena nerviśa ityādau vṛttau yaduktamaḍāgamastadbhaktastadgrahaṇena gṛhyata iti tadupapannaṁ bhavati | tathāhi | vikaraṇānnityāt parasmādapi niyamaḥ karttavyaḥ | niyamakāle ca tadaivāḍāgamaḥ prāpnoti nāsāvaḍāgamo niyamenāpasāryate vikaraṇādeva niyamasya balīyastvāt | nāpi vikaraṇenāpasārayituṁ śakyate niyamapravṛttikāle tasyāvidyamānatvāt | tadevaṁ niyamāḍāgamayoryugapatprāptau paratvādaḍāgamastato yuktamuktamaḍāgamastadbhaktastadgrahaṇena gṛhyata iti | nanu ca niyamena pravarttamānena vikaraṇo bādhyeta tadbādhakakāḍāgamapravṛttikāle vikaraṇo nityo'ḍāgamāt prāk kasmānna bhavati | ucyate | yadi vikaraṇī'ḍāgamaṁ bādheta tato niṣpratidvandvī kimiti niyamo vikaraṇaṁ na bādheteti | tathā edhiṣyate aidhiṣṭetyatrānudāttaṅita ātmanepadameva bhavati na parasmaipadamiti | anyathā paratvānnityatvācca vikaraṇeṣu kṛteṣu syādiṣu tairvyavadhānādanudāttaṅidbhya evātmanepadaṁ śeṣādeva parasmaipadamiti niyamo na syāt | evaṁ ca sāmānyena tibādayaḥ syuḥ | niyamastvāste śete ityādiṣu kṛtārthaḥ | yadyevaṁ syādīnāṁ lāvasthāyāmutpattirna prāpnoti | lādeśe tu kṛte edhiṣyate ityatra dvayaṁ prāpnoti yak pratyayaḥ syapratyayaśca tatra paratvādyakaiva bhāvyam | ucyate | kartṛvācini sārvadhātuke śapi prāpte bhāvakarmaṇostu yaki syādayo vidhīyamānāḥ sāmānyena sarveṣāmapavādatvādbādhakā bhavanti ||

ayaṁ cārtho vṛdbhyaḥ syasanoḥ ityatra parasmaipadabidhā nena jñāpitaḥ anyathā vṛtu varttana ityevamādīnāṁ syena vyadhāna cādanudāttaṅita ātmanepadam iti niyamo nāstīti sāmānyavihiteṣu tibādiṣu siddhamubhayaṁ vartsyati varttiṣyatai iti kimanena vidhānena | tatkṛtamasyārthasya jñāpakam | 

anye tvasmāj jñāpakāt kṛte'pi vikaraṇe niyamaḥ pravarttate iti paribhāṣāmāhuḥ | asmin darśane edhiṣyata ityatra lāvasthāyāmevāntaraṅgatvātsyapratyayena bhavitavyam | tathā'sminneva darśane aupyata auhyata ityatrājāditvādāḍajādīnām ityāḍ bhavati | anyathā hi vikaraṇānniyamasya balīyastve niyamāḍāgamayoḥ saṁpradhāraṇāyāṁ paratvādaḍāgamena bhavitavyam | na cāḍāgamapravṛttikāle nityo vikaraṇaḥ śakyate pravarttayitum | pūrvameva niyamenāpasāritatvāt | āḍāgamastu niyamena nāpasāryat iti paratvādasau bādhakaḥ prāpnotyeva | tadevaṁ halāditvādaḍāgame kṛte āṭaśca iti vṛddyabhāvādauhyata ityavamādi na sidhyati | tathā'sminneva darśane ṛccheranādeśasya grahaṇam | atyārdeśasya carttītyeva siddheriti samo gamyādi sūtre vṛttgrantha upapadyate | na hi vikaraṇānniyamabalīyastve śeti vikaraṇe vidhīyamāna ṛcchādeśa ātmanepadātprāgeva bhavate | tathā'sminneva darśane nergadādi sūtre vikaraṇāttasyāḍāgama uktaḥ | anyathā vikaraṇānniyamabalīyastve tatopi paratvādaḍāgame kṛte kathaṁ vikaraṇāntasyāḍāgama upapadyate |

atha vikaraṇebhya ityatra nirddeśe bhyasaḥ sakārasya rutve kṛte  rukārasyopadeśe'janunāsika it itītsaṁjñā na prāpnoti pūrvatrāsiddham ityasiddhatvāt | ucyate | rorukārasyānunāsikapratijñānasāmarthyādasiddhatvaṁ na bhavati | tathā copadeśe'janunāsika ityatra rakṣitaḥ | itsaṁjñāyāmasiddhatvaṁ nāsti sasajuṣo ruḥ ityatrokārasyetsaṁjñārthamanunāsikatvapratijñānasāmarthyāditi | atrocyate | haśi ca ityatrānunāsikaviśiṣṭasya rorgrahaṇaṁ yathā syādityevamarthaṁ rorukārasyānunāsikatvapratijñānaṁ syāt | tena taruvanamityatra haśi ca ityutvaṁ na bhavati | tatkutastatsāmarthyāditsaṁjñā'bhidhīyate | na ca vācyaṁ kṛtrimākṛtrimanyāyena sasajuṣo ruḥ ityasyaivottvena bhavitavyam | na taruvanādau | kṛtrimākṛtamayorubhayorhi saṁbhave kṛtrimaparibhāṣāpravṛtteḥ | tathāhi | utvaśāstre sasajuṣo ruḥ ityasyāsiddhatvāttaruvanasyaiva sambhavo netarasya | evaṁ tarhi rephasyaivānunāsikatvaṁ pratijñāyatāṁ svaritatvapratijñānavat | tathā cottvavidhāvanunāsikaviśiṣṭasya rephasyottve vidhīyamāne punarbhavādau kathamuttvaprāptiḥ | tadevaṁ rephasyānunāsikatve pratijñātavye yadukārasya pratijñānaṁ tatsāmarthyāditsaṁjñā bhaviṣyati | etadapi na | evaṁ sthita eva śāstre rorukāramakṛtvaiva punaranantaroktaprakāreṇeṣṭasiddherukāro'nubandho vyarthaḥ syāt | evaṁ tarhi vyaktipadārthāśrayaṇena sāmarthyam | etacca sasajuṣo ruḥ ityatrokārasyetsaṁjñārthamanunāsikatvaṁ pratijñātamiti vadatā maitreyeṇa pratipāditam | anyaḥ punarāha | anunāsikaviśiṣṭasya yadroruttvaṁ tadapyasiddhabādhanamantareṇa na sambhavati | tathetsaṁjñāpi | tatra yathā'siddhatvaṁ bādhitvānunāsikapratijñānamuttvaṁ pravarttayati tathetsaṁjñāmapi pravarttayati | na cottvamāśrayātsiddhamiti vacanātpravarttate | vipakṣe pramāṇābhāvāt || 19 ||

iti paribhāṣāvṛttau bhūpādaḥ || 3 || 

sakṛḍgatau vipratiṣedhe yadbādhitaṁ tadbādhitameva || 20 ||

punaḥ prasaṅgavijñānātsiddham || 21 ||

vacanadvayamidaṁ vipratiṣedha sūtre vyaktijātipakṣayo phalabhūtaṁ paribhāṣārūpeṇa paṭhyate | tathāhi | vyaktau padārthe pratilakṣyaṁ lakṣaṇasya vyāpārabhedātparyāyeṇa dvāvapi vidhī prāptau | yathā devadattayajñadattābhyāmekatra bhājane krameṇa bhujyate | tatra vipratiṣedhe param ityanena vipratiṣedhaviṣayo niyamyate | vipratiṣedhe parameva na pūrvamiti | na caitena pūrvavākyānarthakyam | vipratiṣedhasūtreṇa tasyāsattvākhyāpanāt | tadidamucyate | sakṛdgatau vipratiṣedhe yadbādhitaṁ tadbādhitameveti | tasyāyamarthaḥ | sakṛdekavāraṁ yadbādhitaṁ tadbādhitameveti | gatau vipratiṣedhe |

tenājjaserasuk ityanena paratvādasuki kṛte punaḥ śībhāvo na bhavati | ye pūrvāsa iti | tathā stāt tvamityatra tātaṅaḥ sthānivattvāḍvibhāvo na bhavati | ghvasoreddhāvabhyāsalopaśca iti sasyaittvaṁ ca | etacca sthānivat sūtre bhāṣye vyākhyātam |

jātau tu padārthe sakṛdekavāraṁ lakṣaṇaṁ pravarttate | viṣayāntare cobhayaṁ caritārthamiti vipratiṣedhaviṣaye'pravṛtirevobhayoḥ prāpnoti | yathobhayostulyabalayorekaḥ preṣyo virodhādekasyāpi kāryena pravarttate | tatra vipratiṣedhe paraṁ kāryam ityasya paravidhau vyāpārātpūrvanivṛttāvavyāpāra iti | nanu pūrvavākyasya prāgevoktā nivṛttistatkathamidānīṁ tadvidhānam | ucyate | yugapadvirodhādapravṛttirityuktam | paratvātparavidhau kṛte virodhābhāvādyukta eva pūrvidhiḥ | tadidamucyate | punaḥprasaṅgavijñānātsiddhamiti |

tena bhinddhakītyatra paratvāddhibhāve kṛte punarakac kriyate | ījaturityatra paratvātsaṁprasāraṇe kṛte punardvirvacanam |

yatra pūrveṇa pravarttamānena parasya bādhā tatra sakṛdgatiparibhāṣā | yatra tu pūrvaṁ pravarttamānaṁ paraṁ na bādhate tatra punaḥ prasaṅgavijñānātsiddhamiti keṣāṁ cinmatam | tadayuktam | evaṁ hyakṣī ityatra paratvādī ca dvivacane itīkāre kṛte punarnum syādeva | tasmāllakṣyasthityaiva hyetayorvyavastheti |

atha punaḥprasaṅgavijñānādityatra nirddeśe punaḥśabde padatvāśrayaḥ kathaṁ visarjanīyaḥ | yāvataikavākyatāyāṁ karmādīnāmekatvādau svādibhirbhavitavyam | punaḥ śabdaścāvyayam | avyayāni ca liṅgasaṁkhyārahitāni | ucyate | pañcakapakṣe sāmānyena svādividhānam | tato bahuṣu bahuvacanam ityanena bahuṣvartheṣu bahuvacanamevetyarthaniyamena pratyayasyāniyatatvādavyayebhyaḥ svādayo vidyanta eva | athāpi bahuṣvartheṣveva bahuvacanamiti pratyayaniyamaḥ | tathāpi tulyajātīyāpekṣayā niyamasya yatra saṁkhyāsti saṁkhyāntaraṁ ca vyāvarttyaṁ tatraiva niyamena bhavitavyam | evaṁ ca saṁkhyāśabdebhyo devadattayajñadattaviti dvandvasamāsācca tathā vanasyāgre'grevaṇaṁ prācīnaṁ grāmādāmrā ityatrānabhidhānāt sarvasubādyabhāvo vācyaḥ | ata eva hi trikapakṣe'pyanekavākyatāṁ svādi sūtre vakṣyati nyāsakāraḥ | bahuṣu bahuvacanam ityanenānekavākyatāpīhākhyāyata iti | atha yadā trika ekavākyatāpakṣastaḍhā kathaṁ svādayaḥ | kathaṁ ca na syuḥ | ekatvādyabhāvāt | yadyevaṁ vṛkṣādibhyo'pi na prāpnuvanti tatra yathā vṛkṣādibhyo bahuṣu bahuvacanam ityādinā svādibhiravidyamānā eva saṁkhyādayo'bhidhīyante | tathā'vyayebhyo'pyabhidhāsyante | naitat | pratyāsattyā prātipadikārtha eva yatra saṁkhyādayaḥ prātipadikenānuktāstatra svādibhiḥ saṁkhyādayo'bhidhīyante nānyatra | yathā ajādyataṣṭāp iti striyāmabhidheyāyāṁ vidhīyamānaṣṭāb vṛkṣādibhyo na bhavati | evaṁ tarhyavyayādāpsupaḥ iti jñāpakātsaṁkhyākarmādirahitebhyo'vyayebhyo'pi svādayo bhavanti | tathā ca bahuvacanamityatra nyāsakṛtoktam avyayādāpsupaḥ iti jñāpakādavyayebhyastu nitsaṁkhyebhyaḥ sāmānyavihitāḥ svādayo vidyanta eveti | tatra rakṣitenoktam | avyayādāpsupaḥ iti jñāpakaṁ vyaktau | astyeva hi tasya viṣayaḥ pralambate svarityādiravakāśaḥ | pralambate svarityatra hi pralambanakriyāpekṣayā svaḥśabdādavaśyamevāpādāne pañcamyā bhavitavyamatastasyā lugarthaṁ saj jñāpakaṁ kathaṁ syāt | tarhi vyaktāvaliṅgasaṁkhyaṁ yadavyayaṁ nīcairityādi tadarthaṁ yatkṛtaṁ taj jñāpakam | nanvatrāpi prātipadikārtha ityādinā | prātipadikārthamātre vihitāyāḥ prathāmāyā lugarthaṁ syāt tatkathaṁ jñāpakam | ucyate | dvitīyādyarthaṁ yat kṛtaṁ taj jñāpakam | etaccāsamyak avyayād dvitīyādividhānasya na kiṁ citprayojanam | sapūrvāyāḥ prathamāyā vibhāṣā iti vikalpitatemayādividdyabhāvaḥ prayojanamiti cet | na | prathamāvidhānapakṣe teṣāmavaśyaṁbhāvāt | evaṁ tarhi dvitīyādyantānāṁ dvitīyādisamāsaḥ prayojanamiti cet | etadapi na | yataḥ pratyāsattyā tatra śritādinimittā dvitīyā samasyate | evaṁ ṣaṣṭhītyādāvapi supsupetyadhikārāttannimittā vibhaktirgrahītavyā | ucyate | prātipadikārtha sūtre arthagrahaṇamanabhisaṁdhāya jñāpakamidam | tadabhisaṁdhāne jñāpakasya prayojanaṁ nāsti | arthagrahaṇādevāvyayebhyaḥ prathamāyāḥ siddhatvāt | ata eva prātipadikārtha sūtre rakṣitaḥ | arthagrahaṇamaliṅgārtham | taccāvyayam | ata eva saṁkhyārahitebhyopi prathamā siddhetyavyayādāpsupaḥ iti sūtraṁ jñāpakaṁ prapañcatayoktam || 21 ||

antaraṅgabahiraṅgayorantaraṅgaṁ balavat || 22 ||

iyaṁ paribhāṣā vipratiṣedha sūtre bhāṣye nyāse ca paṭhitā |

tena dyaukāmiḥ sautthitirityādau vibhajyānvākhyānapakṣe bahiraṅgāyā vṛddherdaurbalyādantaraṅgau yaṇekādeśau bhavataḥ | tadetadudāharaṇaṁ diṅmātram | samarthānāṁ prathamādvā ityatra samarthagrahaṇātsamarthitasarvakāryāttadvitena bhavitavyamityevaṁ yaṇekādeśayoḥ siddhatvāt | idaṁ tūdāharaṇaṁ vṛkṣāi ihetyādau bahiraṅgādakaḥ savarṇadīrghādantaraṅgo guṇaḥ | na caitadasiddhaṁ bahiraṅgaḥ mantaraṅgaḥ ityanayā paribhāṣayā sidhyati | acorānantarye nājānantarye bahiṣṭvapraklṛptiriti tasyāḥ pratiṣiddhatvāt | nanvevaṁ kṛte'pyatra savarṇadīrghatve'caḥ parasminpūvavidhauṁ iti sthānijadbhāvādāṅguṇena siddhaṁ vṛkṣa iheti | naitadasti | ekādeśasya pūrvagrahaṇena grahaṇāt padāntavidhitvena sthānivattvapratiṣedhāt | parādigrahaṇaṁ tu na vācyam | parāditvena na padāntādi sūtrāvyāpārasyāyuktatvāt | nanvantaraṅgaparibhāṣāpi na prāpnoti | nājānantarye iti niṣedhādeva | tathāhi yathā asiddhaparibhāṣayā ṣatvatukorasiddha ityasyānarthakatvaṁ tathāntaraṅgaparibhāṣayāpi | ucyate | naivāntaraṅgaparibhāṣayā ṣatvatukorasiddha ityasyānarthakyam | yatastuko'ntaraṅgatvātprāptiḥ | dīrghasya nityatvāt | tatra paratvāddīrgha eva prāpnoti | yattūcyate nityādapyantaraṅgaṁ balīya iti tatparatvaphalaṁ na tvapūrvamiti | atha vā'stvantaraṅgatvāttuk | dīrghatve kṛte nimittāpāyaparibhāṣayā tannivṛttiḥ syādeva | tadevaṁ bahiraṅgaparibhāṣayaivānarthakyaṁ ṣātvatukorasiddha ityasya | atastasyā eva nājānantarya iti pratiṣedhaḥ | kiṁ ca yadyatrāntaraṅgaparibhāṣāyāḥ pratiṣedhaḥ syāttadāntaraṅgaparibhāṣā nirviṣayā syāt | 

iyaṁ ca paribhāṣā bahiraṅgaparibhāṣayaiva sarvakāryasya siddhatvād bhāgavṛttikṛtā nābhyupagamyate | tanmate vṛkṣa ihetyādāvacorānantarye yadyapi bahiraṅgaparibhāṣā nāsti | tathāpi padasaṁskārapakṣe doṣapratikṣepo vyākhyeyaḥ | yadāhuḥ | “suvicārya padasyārthaṁ vākyaṁ gṛhṇanti sūraya” iti | yuktaṁ caitat | anyathā vākyasaṁskāre vṛkṣai ihetyādau śabdaparavipratiṣedhenāntaraṅgamādguṇaṁ bādhitvā sarvaṇadīrghatvameva syāt | yathā diva ut ityatra divokamo devā ityatra ukārasya yṇādeśo rakṣitenotkaḥ | na cāntaraṅgaparibhāṣāsāmarthyād vṛkṣai ihetyādāvābguṇenaiva bhavityam | evaṁ hi divokasa ityatrāpi ikārasya yaṇādeśaḥ syāt |

athāsyā udāharaṇāntaraṁ kaścāya | ṛtviya iti | atra ghas, tasya iyādeśe kṛte siti ca iti padasaṁjñāntaraṅgatvādajādau vidhīyamānāṁ bahiraṅgāṁ yaci bham iti bhasaṁjñāṁ bādhate | samāveśastu nāsti | ekasaṁjñādhikārāt | etaccāyuktam | siti ca iti sūtrārambhādeva bhasaṁjñābādhakatvasya siddhatvāt | ata evaitadarthataikasaṁjñādhikārasya na ghaṭate | tathāhi | svādiṣviti padasaṁjñayā yaci bham iti bhasaṁjñāyāḥ samāveśe siddhe siti ca iti kṛtaṁ yadi punaḥ samāveśaḥ syāttadā siti ca ityanarthakameva syāt | athaitatsyāt | yaci bham ityatraikasaṁjñādhikārābhyupagamād bhapadasaṁjñayoḥ samāveśo nāsti | evaṁ ca siti ca ityatrāsatyekasaṁjñādhikāre ṛtviya ityatra bhapadasaṁjñayoḥ samāveśaḥ syādeva | nanvemapi siti ca ityanarthakam, tasya hyetatprayojanam | ṛtviya ityatra sittvātpadatvenaurguṇo mābhūditi | bhasaṁjñāsamāveśe tu syādevaurguṇaḥ iti | evaṁ cākaḍārāt ityatra yadetadanunyāsakāreṇoktam | anavakāśāyāstvidamucyate | ayaṁ te yonirṛtviya ityatra padasaṁjñā bhasaṁjñā bādhata iti | tadayuktam | nāyuktam | padatvasyāvagrahārthatvāt || 22 ||

ubhayanirddeśe pañcamīnirddeśo balīyān || 23 ||

yatra pañcamīnirddeśo'sti saptamīnirddeśaścopātto'nuvṛtto vā tatra pañcamīnirddeśasya balīyastvāttasmādityuttarasya iti pravarttate |

tenāmi sarvanāmnaḥ suṭ ityatrāt ityanuvṛttau avarṇāntātsarvanāmna ityanayā pañcamyā āmītyasyāḥ saptamyāḥ ṣaṣṭhyāṁ parikalpitāmāma eva suḍāgamo bhavati | 

ayaṁ ca vipratiṣedhe paraṁ kāryam ityasyārthaḥ paribhāṣārūpeṇa paṭhyate | tathāhi | tasminniti nirddiṣṭe pūrvasya iti saptamīnirddeśa iko yaṇaci iti dadhyatra madhvantretyatra sāvakāśaḥ | tasmādityuttarasya iti pañcamīnirddeśo raṣābhyāṁ no ṇa ityatra kṛtārthaḥ | āstīrṇamiti | yatra tu saptamīnirddeśaḥ pañcamīnirddeśaścobhayaṁ kṛtārthaṁ tatrobhayaprāptau paratvāttasmādityuttarasya iti pravarttate | tathāhi | āmi sarvanāmnaḥ suṭ ityatrāt iti pañcamī ājjaserasuk ityatrāsugvidhau kṛtārthā | amīti saptamī trestraya ityatra kṛtārthā | ubhayostulyabalayorvirodhe paratvātpañcamī saptamyāḥ ṣaṣṭhītvaṁ kalpayati | yatra tvanavakāśā saptamī tatra saptamīnirddeśa eva pañcamyāḥ ṣaṣṭītvaṁ kalpayati | yathā''ne muk ityatra''na iti saptamī niravakāśāto yeyaḥ ityatrāta iti kṛtārthāyāḥ pañcamyāḥ ṣaṣṭhītvaṁ kalpayati | tataścāne parato'kārāntasyaivāṅgasya mug bhavati | yadyeva ḍaḥ si ghūṭ ityatra kathamanayā sakārādeḥ parasya dhuḍāgamaḥ | na hi sītyasyāḥ saptamyāḥ kvāpi kṛtārthatvam | ucyate | yathā sītyasyāḥ saptamyā anavakāśatvaṁ tathā ḍa ityasyā api pañcamyāḥ | evaṁ cobhayoranavakāśayoryuktameva paratvam | na ca yugapadanyonyaṣaṣṭhīkalpanā śaṅkyā, nāpi krameṇa | ekaḥ pūrvaparayoḥ ityatra pūrvaparagrahaṇāt | taduktam | na ca yugapadabhaye prakalpike pūrvaparagrahaṇāditi | na caivaṁ saptamīnirddeśasyānarthakyam | lāghavārthatvāt | sa iti nirddeśe gauravaṁ syāditi | etacca ḍaḥ si dhuṭ ityatra nyāse uktam | iha tu dīrghātpadāntādvā ityatra yadyapi cha iti saptamī kṛtārthā, tathāpi tasyāḥ svaritāsaṅgādihānuvṛttāyā niravakāśatvāddīrghādityasyāḥ pañcamyāḥ ṣaṣṭhītvaṁ prakalpayati | pañcamī tu paurvāparyaṁ prakalpya sāvakāśā nivarttate | tenāyamartho bhavati | dīrghāduttaro yaśchākārastasminparataḥ pūrvasyaiva dīrghasya tugbhavati tatrāsyā na vyāpāra iti tasmādityuttarasya ityatra nyāsaḥ | dīrghāt ityatra tu nyāsakṛtā tasmādityuttarasyetyatra tasmāditi yogavibhāgaḥ karttavyaḥ | pūvasūtrātpūrvasyetyanuvarttate | tena dīghāt ityādau satyapi pañcamīnirddeśe pūrvasyaiva kāryaṁ bhavatītyuktam || 23 ||

sarve vidhayaśchandasi vikalpyante || 24 || 

tana dhuri dakṣiṇāyāmityatrārthe saptamyā vikalpitatvāccheṣe ṣāṣṭhīvidhānāddhuri dakṣiṇāyā iti sidhyati | tathā ye yūpāya takṣatītyatra takṣatīti bahutve ekavacanam |

ayaṁ cārthaḥ ṣaṣṭhīyuktaśchandasi vā ityatra yogavibhāgena sādhitaḥ | iyaṁ ca paribhāṣā vyatyayo bahulamityasyaiva prapañcaḥ || 24 ||

pratyayagrahaṇe yasmātsa vihitastadādestadantasya grahaṇam || 25 ||

pratyaye gṛhyemāṇe yasmādasau vihitastadādereva bhāgasya tatpratyayāntasya ca grahaṇaṁ bhavati |

prayojanaṁ dhātupratyayaprātipadikataddhitāḍhyaḥ | sanādyantā dhātavaḥ iti yasmātman vihitastadādestadantasyaiva dhātusaṁjñā | cikīrṣatīti | na saṁghātasya | prācikīrṣaditi | kṛttaddhitasamāsāśca iti kṛttaddhitāntasya prātipadikasaṁjñā tadādestadantasyaiva | kārako gārgya iti | na saṁghātasya | vipraḥ kārako vipro gārgya iti | supa ātmanaḥ kyac | putramiccati putrīyati | saṁghātānna bhavati | mahāntamputramicchatīti | taddhitavidhau yañiñośca iti pratyayayorgrahaṇaṁ yatastau vihitau tadādereva phak pratyayo bhavati | gārgyāyaṇa iti | saṁghātānna bhavati | vipro gārgyāyaṇa iti | supsupā iti samāso na saṁghātasya | ṛddhasya rājñaḥ puruṣa iti | 

sa cāyamartho yasmātpratyayavidhi sūtre yogavibhāgena sādhitaḥ | tathāhi | yasmātpratyayavidhistadādi pratyaye iti vigṛhyate | gṛhyamāṇe iti cādhyāharttavyam | pratyaye gṛhyamāṇe yasmāt vihitastadādireva ghiyate na tu pratyayāntaḥ saṁghāta iti | 

ata evāṅgapāde yasmādādi sūtraṁ kṛtvā aṅgasya iti sūtraṁ na khaṇḍyate | nanu tatrāpi yogavibhāgena paribhāṣā sidhyati | satyaṁ sidhyati | kiṁ tu na strīpratyaye cānuparjane iti dvitīyā na sidhyati | tathāhi | atra kṛte neyaṅuvaṅsthānāvastrī ityato'strīgrahaṇamanuvarttate | tatrānuvṛttisāmarthyātstrīpratyayasya grahaṇam | pradhāne ca kāryasaṁpratyayānna strīpratyaye cānupasarjane iti labhyate | tarhi prakaraṇamevedamaṅgapāde kriyatām | nacaivamatatakṣadityatra laghusaṁjñāgurusaṁjñayoḥ samāveśaḥ syāditi vācyam | laghusaṁjñāpraṇayanavaiyarthyaprasaṅgāt | anyathā laghupradeśe hrasvagrahaṇameva kuryāt | ucyate | yasmādādisūtrāttadādigrahaṇaṁ suptiṅantaṁ padam ityatrānuvarttate | tadarthamiha prakaranam | tena dviḥ prayogo dvirvacanamiti pakṣe tadādigrahaṇāt pacasipacasi iti samudāyasya suptiṅantaṁ padam iti padasaṁjñā sidhyati | tathāhi | artharūpayoḥ sāmyāt sa eva pacśabdaḥ sa eva tiṅ yaḥ pūrvasmādvihitaḥ sa eva parasmādapi vihitaḥ yaḥ parasmādapavihitaḥ sa pūrvasmādapitī tadādigrahaṇāt samudāyasya padatvam | tasya ca padatve āpacasipacasi devadattā ityatrāma ekāntaramāmantritamanantike ityekāntaratā siddhā bhavati | etacca sarvasya dve ityatra bhāṣyavyākhyānaṁ rakṣitenoktam | atrocyate | nanvekaikasmādapyatra tiṅ vihitastatonekaṁ padam | ucyate samudāyena vākyaparisamāptiriti samudāyasya padatvam | yatha samudāyasyāvayavānāṁ caikāctve samudāyasya dvirvacanaṁ bhavati nā vayavānāṁ papāceti | tathehāpi samudāyasya padatvam | evaṁ samudāyaśāstramanugṛhītaṁ bhavati | avayavayostu padasaṁjñāyāṁ samudāyasya tyāgāttadviṣayaṁ śāstraṁ hīnaṁ syāt | tadādigrahaṇānuvṛttirapyapārthā syāt | atra tu pakṣe andho'ndho duḥkhītyādau pratyekaṁ padatvābhāve padakāryaṁ na syāt | tadarthaṁ pratyekaṁ vākyaparisamāptyā tatre padatve padakāryamanusandheyam |

anyastvāha gaurībhyāmityatra gurusaṁjñāyāṁ guroranuta iti plutaḥ syāt | sthite tvekasaṁjñādhikāre nadīsaṁjñaivāpavādatvānna gurusaṁjñeti | nanu sthitepyekasaṁjñādhikāre gurusaṁjñānadīsaṁjñayorbādhyabādhakabhāvo nāsti | bhinnaviṣayatvāt | tathāhi | gurusaṁjñā varṇamātrasya nadīsaṁjñā tvīkārāntasya | ucyate | varṇamātrasyaiva keṣāṁ cinmate nadīsaṁjñā | na cāsmin pakṣe lakṣmīprabhṛtiṣu strītvābhāvānnadīsaṁjñā na prāpnotīti vācyam | yatsamudāyagataṁ strītvamavayave samāropya nadīsaṁjñāvidhānāt | jñāpakaṁ cātra neyaṅavavaṅsthānāvastrī iti pratiṣedhaḥ | tathā cācchīnadyornum ityatra śīnadyoḥ parata iti vṛttāvuktaṁ tadevaṁ varṇapakṣe doṣaḥ | tasmādyathānyāsamevāstu | etattvanāgamam || 25 ||

na strīpratyaye cānupasarjane || 26 ||

yeyaṁ pratyayagrahaṇaparibhāṣā sā strīpratyaye'nupasarjane grāhikā na bhavati |

tena stryadhikārapratyayagrahaṇe saṁghāto'pi gṛhyate | na tu yataḥ strīpratyayastadādireveti vākyārthaḥ | tena strībhyo ḍhak iti yato'ṇ tadantātkāraśabdān ṅīp | na tadādestadantādeva ḍhak pratyayaḥ | api tu samudāyādeva kaumbhakāreya iti | anyathā hi avayavasya vṛddhisvarau syātām | nanvaṇantān ṅīb vidhīyamānaḥ kṛdgrahaṇaparibhāṣayā kumbhakāraśabdādeva bhaviṣyati | ucyate | ṭiḍḍhāṇañ ityatrāṇiti na kṛdgrahaṇam | api tu kṛdakṛdgrahaṇam | nanu pratyayagrahaṇaparibhāṣāyā abhāvādyathā strīpratyayāntāḍ ḍhagvidhīyamānaḥ kumbhakārītyasmātsamudāyaśabdādbhavati tathā kāraśabdādapi kva citsyāt | naitat | prādhānyātsamudāyādeva pravṛtteḥ |

tathā ṣyaṅaḥ saṁprasāraṇam ityatra ṣyaṅaḥ stryadhikāre vidhānāt strītvaṁ, sthānivadbhāvena pratyayatvam | atastadgrahaṇe pratyayagrahaṇaparibhāṣāyā niṣedhāt ṣyaṅmātrasya saṁprasāranaṁ paramakārīṣagandhīputra iti | 

anupasarjana iti pratiṣedhādupasarjane strīpratyaye pratyayagrahaṇaparibhāṣā pravarttata eva | tenātikārīṣagandhyaputro'tikārīṣagandhyapatirityatra saṁprasāraṇaṁ na bhavati |

nanvevamapi pradhāne kāryasaṁpratyayātpradhānapratyayagrahaṇa eva pratyayagrahanaparibhāṣayā bhavityam | evaṁ cātikārīṣagandhyaputra ityatra saṁprasāranaṁ syādeva ucyate | yadyatra saṁprasāraṇaṁ syāttadānupasarjana iti pratiṣedho'narthakaḥ syāt | 

nanvevamapyardhapippalītyatrāpi pratyayagrahaṇaparibhāṣayā halṅyādinā sulopo na prāpnoti | strīpratyayāntasyopasarjanatvāt | ucyate | ekavibhakti cāpūrvanipāta ityatrānuvṛttavibhāṣāgrahaṇasya vyavasthitavibhāṣāvijñānādupasarjanasaṁjñāyā abhāvaḥ kṛtaḥ | ato na strīpratyaya iti tadāditadantaniyamaniṣedho bhavatyeva | nanu śāstrīyopasajarnasaṁjñāmābhūt | laukikaṁ yadupasarjanaṁ tasminsati na strīpratyaya iti pravarttituṁ notsahate | anupasarjana iti pratiṣedhāt | tataśca pratyayagrahaṇaparibhāsayā tadādiniyamena bhavitavyameva | upasarjanagrahaṇena laukikamupasarjanaṁ gṛhyata eva | tathāhi | pañcakhaṭvītyatra samudāyibhyo'nyaḥ samudāya ityetasmindarśane śāstrīyopasarjanasaṁjñābhāve'pi laukikamupasarjanamāśritya gostriyorupasarjanasya iti hrasvamuktā dvigoḥ iti ṅībuktaḥ | ucyate | ekavibhakti cāpūrvanipāte ityatrānuvṛttavibhāṣāgrahaṇasya vyavasthitavibhāṣāvijñād yathārdhapippalītyatra śāstrīyopasarjanābhāvena laukikopasarjanāśrayaṁ hrasvatvaṁ na bhavati | tathānupasarjana iti pratiṣedho'pi na bhavati | atha vā halaṅyādi sūtre dīrghagrahaṇāt kva cidupasarjanastrīpratyaye'pi na strīpratyaye ityevātra varttata ityāhuḥ | tenārdhapipyalītyatra halṅyādi lopaḥ sidhyati | nanu kathaṁ jñapakam | yāvatā vipakṣe he amba he nadi ityatra sulopo mābhūdityevamarthaṁ dīrghagrahaṇaṁ karttavyam | nanvatra bhavitavyamevaiṅhrasvātsaṁbuddheḥ iti sulopena | na ca dīrghagrahaṇātte nāpi na bhavitavyamiti vācyam | anyathā hi halṅyādi sūtre dīrghagrahaṇameṅhrasvāt iti sūtraṁ cākṛtvā hrasvaiṅoraṅyāpaḥ saṁbuddheriti kuryāt | ata eveha he amba he nadi ityādau sulopo na bhaviṣyatīti | nanvevamapi badaryāḥ phalaṁ vikāra iti tasya vikāra ityarthe'nudāttādeśca ityañaḥ phale luk iti luki luk taddhitaluki iti ṅīpo'pi luki kṛte'sati dīrghagrahaṇe pratyayagrahaṇena badaramityatra sulopaḥ syāt sa mābhūditi sārthakaṁ dīrghagrahanam | ucyate | paratvādiha napuṁsakādamā sulopo bādhanīyaḥ | vyaktipadārthāśrayaṇāduktamiti vā || 26 ||

saṁjñāvidhau pratyayagrahaṇe tadantavidhirnāsti || 27 ||

tena taraptamapaughaḥ iti tarammātrasya ghasaṁjñāyāṁ gharūpakalpa iti ghe hrasva ucyamānastarapi bhavati | na tu tarabante | gaurī brāhmaṇitareti | tathā ktaktavatū niṣṭhā iti ktaktavatvoreva niṣṭhāsaṁjñā | na tu tadantayoḥ | tena dṛṣattīrṇetyatra dṛṣado dakārātparasya natvābhāvo dakārasya ca pūrvasyeti |

nanu saṁjñāvidhau pratyayagrahaṇaparibhāṣā mābhūt | hrasvavidhau tu ghānte evottarapade hrasvatvena bhāvyam | ucyate | hṛdayasya hallekhayadaṇlāseṣu ityatrāṇgrahaṇaṁ kṛtvā lekhagrahaṇāddhrasvavidhāvapi na tadantavidhiḥ | radābhyām iti natva vidhāvapo saṁjñāvidhau tadantavidhipratiṣedhasāmarthyādeva na tadantavijñānam | nanu hrasvavidhau tadantavidhiniṣedhasya kṛtārthatvāt sāmarthyamayuktam | ucyate | yadi saṁjñāvidhau tadantavidhi pratiṣedhasya taraptabvidhāveva prayojanaṁ tadā suptiṅantaṁ padam ityatrāntagrahaṇamakṛtvā saṁjñāvidhau pratyayagrahaṇe tadantavidhirnāstītyapyajñāpayitvā taraptamapau pitau gha iti kriyatām | ayaṁ cārthaḥ pitau taraptamapau ghasaṁjñau bhavata iti | antagrahaṇāttu saṁjñāvidhāvityāderano'pi viṣaya iti | atha vā natvavidhau pratyayagrahaṇaparibhāṣā nāsti niṣṭhāśabdasya takāraviśeṣaṇatvenopādānāt | 

kṛttaddhitasamāsāśca ityatra kṛttaddhitagrahaṇena tadantasyaiva saṁjñā na tatrayamupatiṣṭhate | yato'pratyaya iti pratiṣedhe prāpte kṛttaddhitayoḥ saṁjñā''rabhyate | apratyaya iti ca pratyayāntasya pratiṣedha ityuktam | tena tadantasya pratiṣedhe prāpte saṁjñā''rabhyamāṇā tadantasyaiva bhavati | sātpadādyoḥ ityatra sādgrahaṇācca | yadi kevalasya taddhitasya saṁjñā syānna tadantasya tataḥ sāteḥ prātipadikatvāt tataḥ supi padāditvāt ṣatvapratiṣedhe siddhe sādgrahanamanarthakaṁ syāt | supi stha ityādau tu subgrahaṇe tadantasyopapadasaṁjñārtho yatnaḥ karttavyaḥ |

jñāpakaṁ tvasyāḥ suptiṅantaṁ padamityatrāntagrahaṇam | suptiṅoḥ pratyayatvāt pratyayagrahanaparibhāṣayaiva tadantatve sitdhe antagrahaṇamihānarthakaṁ syāt || 27 ||

iti paribhāṣāvṛttau kārakapādaḥ || 4 ||

iti prathamo'dhyāyaḥ || 1 ||